گاڑیاں بیچ راستے میںکھڑی کی جارہی ہیں۔ حال ہی میں ۲؍ حادثات بھی ہوچکے ہیں۔پولیس نے کارروائی کا یقین دلایا۔

یہاں اگرولی گاؤں میں غیر قانونی پارکنگ سے لوگوں کو پریشانی کا سامنا کرنا پڑرہاہے۔  شکایت کے باوجود کارروائی کرنے کا ٹریفک پولیس پر الزام عائد کیا جارہاہے۔  ہریش نامی مقامی شخص نے کہا کہ   یہاں سماج مندر کے قریب پل کے نیچے کافی عرصے سے گاڑیاں غیرقانونی طریقے سے کھڑی کی جارہی ہیں۔ اس سے راہ گیروںکو پریشانی کا سامنا کرنا پڑرہا ہے۔ یہ پارکنگ بیچ راستے پرکی جارہی ہے۔ حال ہی میں یہاں ۲؍ حادثے بھی ہوچکے ہیں۔انہوں نے یہ بھی بتایا کہ اگر مالکان سے گاڑیاں ہٹانے کوکہتے ہیں تو وہ داداگیری پر اترآتے ہیں۔ ٹریفک پولیس اس سلسلے میں کوئی بھی کاروائی نہیں کرتی۔ کئی دفعہ اس سلسلے میں شکایت درج کرائی گئی ہے۔

یہ بھی پڑھئے: ودیا وِہار: عمارت میں بھیانک آتشزدگی، سیکوریٹی گارڈ ہلاک، ۳؍ افراد زخمی

اس بارے میں نمائندۂ انقلاب نے نوی ممبئی ٹریفک کے ڈپٹی کمشنرپرشوتم کراڑ سے رابطہ قائم کیا تو انہوں نے بتایا کہ ہم  علاقے میں غیر قانونی پارکنگ کے خلاف اکثر کارروائی کرتے ہیں۔ آپ نے جس جگہ کی نشاندہی کی ہے، وہاں پر  کارروائی کا جلد ہی حکم دوں گا اور میں یقین دلاتا ہوں کہ وہاں سے غیر قانونی پارکنگ کو ہٹایا جائے گا۔ انہوں نے مزید کہا کہ نوی ممبئی میں آبادی میں لگاتار اضافہ ہو رہا ہے۔ لوگوں کو پارکنگ کیلئے جگہ ملنا مشکل ہو رہا ہے۔ اس سلسلے میںسڈکواور میونسپل کارپوریشن کو گاڑیوں کی پارکنگ کیلئے جگہ دینے کیلئے پلاننگ کرنا ضروری ہے۔ اس سلسلے میں ہم   ان سے جلد ہی درخواست کریں گے۔