شمالی مقدونیہ کے قصبے کوچانی کے ایک نائٹ کلب میں خوفناک آگ لگنے کے نتیجے میں ۵۱؍ افراد ہلاک اور۱۰۰؍ کے قریب افراد زخمی ہو گئے۔ ملک کے وزیر داخلہ پنچے توشکوسکی نے کہا کہ نا ئٹ کلب میں موجود نوجوانوں نے آتش بازی کا مظاہرہ کیا جس کے باعث چھت پر آگ بھڑک اٹھی۔

شمالی مقدونیہ (North Macedonia) کے قصبے کوچانی کے ایک نائٹ کلب میں خوفناک آگ لگنے کے نتیجے میں ۵۱؍ افراد ہلاک اور۱۰۰؍ کے قریب افراد زخمی ہو گئے۔ امریکی میڈیا کے مطابق ملک کے وزیر داخلہ پنچے توشکوسکی نے کہا کہ آگ سنیچر اور اتوار کی درمیانی رات تقریباً۲؍ بجکر۳۵؍ منٹ پر ایک مقامی پاپ گروپ کے کنسرٹ کے دوران لگی۔ انہوں نے وضاحت کی کہ نائٹ کلب میں موجود نوجوانوں نے آتش بازی کا مظاہرہ کیا جس کے باعث چھت پر آگ بھڑک اٹھی۔ مقامی میڈیا کے مطابق آگ کوچانی کے ’پلس‘ نائٹ کلب میں لگی۔ 

یہ بھی پڑھئے: رویٹرز کے صحافی نے بیرون ملک ہندوستانی شہریت منسوخ کرنے پر مقدمہ دائر کر دیا

رپورٹ کے مطابق شمالی مقدونیہ کے وزیر اعظم ہرسٹیجان میکوسکی نے سوشل میڈیا اکاؤنٹ ایکس پر لکھا کہ یہ مقدونیہ کیلئے ایک مشکل اور افسوسناک دن ہے۔ اتنی بڑی تعداد میں نوجوانوں کی جانوں کے ضیاع کا ازالہ نہیں کیا جا سکتا، اور خاندانوں، دوستوں اور پیاروں کیلئے جو تکلیف ہے اس کیلئے الفاظ نہیں ہیں۔ سوشل میڈیا پر شیئر ہونے والے واقعے کی ویڈیو میں نائٹ کلب کے اندرونی مناظر میں افراتفری دیکھی گئی۔ ملک کے وزیر انصاف ایگور فلکوف نے کہا ہے کہ اس سانحے میں زخمی ہونے والے۸۰؍ سے زائد افراد کو ملک کے دارالحکومت اسکوپجے کے اسپتالوں اور کلینکس میں منتقل کیا گیا ہے، واقعے میں ملوث ذمہ داروں کوگرفتار کر کے سخت سزا دی جائے گی۔