پاکستان میں ایک شادی سے لوٹ رہی بس بے قابو ہو کر ندی میں گر گئی، جس کے نتیجے میں بس میں سوار ۲۵؍ میں سے ۲۴؍ افراد جاں بحق ہو گئے، قیاس ہے کہ صرف دلہن ہی اس حادثے میں زندہ بچ پائی ہے۔

پاکستان کے شمال میں واقع گلگٹ بالٹستان میں منگل کی شام شادی کی تقریب سے لوٹ رہی بس تیز رفتاری کے باعث حادثے کا شکار ہوکر ندی میں گر گئی۔ اس بس میں۲۵؍ افراد سوار تھے۔حکام کے مطابق صرف دلہن ہی اس حادثے میں بچ سکی ہے۔
راحت رساں افسر وزیر اسد نے بتایا کہ ’’ بس میں کل ۲۵؍ افراد موجود تھے جن میں سے ۱۴؍ لاشیں اب تک برآمد ہو چکی ہیں، جبکہ ۱۰؍ افراد اب تک لا پتہ ہیں۔‘‘ انہوں نے مزید کہا کہ’’ شاید دلہن ہی اس حادثہ کی تنہا زندہ بچ جانے والی مسافر ہے۔‘‘

یہ بھی پڑھئے: لبنان: بیروت کے مضافاتی علاقے پر اسرائیلی بمباری، ۸؍افراد کی موت، ۱۴؍ زخمی

اس پہاڑی خطے کے سینئر پولیس افسر نے بھی اس حادثے کی تصدیق کی ہے۔حکام کے مطابق حادثہ کی وجہ بس کی رفتار ہے،جس کے سبب بس بے قابوہو کر ندی میں گر گئی۔ واضح رہے کہ پاکستان میں اس قسم کے اندوہناک سڑک حادثے اکثر رونما ہوتے رہتے ہیں۔ جہاں ٹرافک کے قوانین پر شاذ ونادر ہی عمل کیا جاتا ہے۔اس کے علاوہ دیہی علاقوں میں خستہ حال سڑکیں بھی اکثراوقات حادثات کی وجہ بنتی رہتی ہیں۔