آج بابا رام دیو کی کمپنی پتانجلی آیوروید نے سپریم کورٹ کو بتایا کہ کمپنی نے اُن ۱۴؍ مصنوعات کی فروخت پر پابندی عائد کردی ہے جن کے لائسنس معطل کردیئے گئے تھے۔ ساتھ ہی، ان ۱۴؍ مصنوعات کے اشتہارات ہر پلیٹ فارم، بشمول سوشل میڈیا، ہٹا لئے گئے ہیں۔ معاملے کی اگلی سماعت ۳۰؍ جولائی کو ہوگی۔

بابا رام دیو کی پتانجلی آیوروید نے آج سپریم کورٹ کو بتایا کہ اس نے اپنی اُن ۱۴؍ مصنوعات کی فروخت پر پابندی عائد کردی ہے جن کے مینوفیکچرنگ لائسنس کو اتراکھنڈ اسٹیٹ لائسنسنگ اتھاریٹی برائے آیورویدک اور یونانی خدمات نے اپریل میں معطل کر دیا تھا۔ یاد رہے کہ ۲۹؍ اپریل کو اتراکھنڈ حکومت کے ادارے نے سپریم کورٹ کو بتایا کہ لائسنس معطل کر دیا گیا ہے کیونکہ پتانجلی آیوروید نے ۱۹۴۵ء کے ڈرگس اینڈ کاسمیٹک قوانین کی بار بار خلاف ورزی کی تھی۔جن ۱۴؍ ادویات پر پابندی لگائی گئی وہ ہیں: سوساری گولڈ، سوساری وتی، برونچوم، سوساری پرواہی، سواساری اولیہ، مکتا وتی ایکسٹرا پاور، لیپیڈم، بی پی گرٹ، مدھوگرت، مدھوناشینی وتی ایکسٹرا پاور، لیوامرت ایڈوانس، لیووگریٹ، آئی گریٹ گولڈ اور پتانجلی گراؤ۔

یہ بھی پڑھئے: امریکہ: انسانی اسمگلنگ کے الزام میں ۴؍ ہند نژاد افراد گرفتار

منگل کو پتانجلی آیوروید نے جسٹس ہیما کوہلی اور سندیپ مہتا کی بنچ کو بتایا کہ اس نے ۵؍ ہزار ۶۰۶؍ فرنچائز اسٹورز کو ان مصنوعات کو واپس لینے کی ہدایت دی ہے۔ کمپنی نے یہ بھی کہا کہ میڈیا پلیٹ فارمز کو ان ۱۴؍ مصنوعات کے اشتہارات واپس لینے کی بھی ہدایت کی گئی ہے۔ عدالت نے پتانجلی سے کہا کہ وہ دو ہفتوں کے اندر حلف نامہ داخل کرے کہ کیا سوشل میڈیا پر ان مصنوعات کے اشتہارات واپس لئے گئے ہیں یا نہیں۔ اس معاملے کی اگلی سماعت ۳۰؍ جولائی کو ہوگی۔
خیال رہے کہ بنچ انڈین میڈیکل اسوسی ایشن کی طرف سے پتانجلی آیوروید کے خلاف دائر درخواست کی سماعت کر رہی تھی جس میں کمپنی پر جدید ادویات اور کووڈ۔۱۹؍ ویکسین مہم کے خلاف ’’لاپروائی سے مہم‘‘ چلانے کا الزام لگایا گیا تھا۔