قطر کے امیر شیخ تمیم بن حماد الثانی نے دوحہ میں منعقد ایشیاکو آپریشن ڈائیلاگ سمٹ سے خطاب کرتے ہوئے کہا کہ اسرائیل نے دیدہ دلیری سے غزہ میں جو کچھ بھی کیا ہے وہ اجتماعی نسل کشی کے مترادف ہے۔

قطر کے امیر حماد الثانی نے دوحہ میں منعقد ایشیا کو آپریشن ڈائیلاگ سمٹ میں جمعرات کو شرکت کی، انہوں نے اس سمٹ میں خطاب کرتے ہوئے مشرق وسطیٰ اور اسرائیل کے تعلق سے کہا کہ ’’ قطر نے پہلے ہی متنبہ کیا تھا کہ اسرائیل کی دیدہ دلیری کے سبب مشرق وسطیٰ میں جو کچھ ہو رہا ہے وہ اجتماعی نسل کشی کے مترادف ہے۔یہ بات بلکل واضح ہو چکی ہے کہ غزہ میں نسل کشی کی جارہی ہے مزید یہ کہ غزہ کو انسانوں کیلئے ناقابل رہائش بنا دیا گیا ہے، خصوصا نقل مکانی کرکے جانے والوں کیلئے۔‘‘

یہ بھی پڑھئے: غزہ جنگ: اسرائیلی جارحیت کا نتیجہ، ۹۰۲؍ خاندان مکمل طور پر ختم

 واضح رہے کہ حماس کے زیر انتظام خطے میں صحت کی انتظامیہ کے مطابق غزہ میں اسرائیل کی وحشیانہ بمباری میں اب تک ۴۱۵۰۰؍ فلسطینی شہید ہو چکے ہیں۔ لبنان میں موجود ایران کی حمایت یافتہ مزاحمتی تنظیم حزب اللہ  کے خلاف کارروائی کرتے ہوئے اس ہفتے اسرائیل نے لبنان پر بھی زمینی حملہ شروع کر دیا ہے۔حزب اللہ، حماس کے ساتھ اظہار یکجہتی کی علامت کے طور پر اسرائیل پر وقتاً فوقتاً راکٹ داغتا رہتا ہے۔