بھیونڈی مشرق حلقہ کے رکن اسمبلی نے ٹریفک جام کوختم کرنے کیلئے ممبئی کی طرز پر’ وار روم‘ بنانے، مارشل کی تعیناتی اور ٹول وصولی پر پابندی کا مطالبہ کیا۔

یہاں سماج وادی پارٹی کے رکن اسمبلی رئیس شیخ نے جمعہ کومحکمہ تعمیرات عامہ، نیشنل ہائی وے اتھاریٹی اور پولیس کے اعلیٰ حکام کے ساتھ ممبئی ناسک ہائی وے کا دورہ کیا۔ رکن اسمبلی نے کھارے گاؤں ٹول روڈ سے وڑپے تک شاہراہ کے گڑھوں اور ٹریفک جام کا معائنہ کرکے مطالبہ کیا ہے کہ نیشنل ہائی وے کی ابتر حالت کو دیکھتے ہوئے پیر سے ٹول وصولی پر پابندی عائدکی جائے۔ نیز ٹریفک کی ڈرون سے نگرانی، ڈیش بورڈ کا قیام، مارشل کی تعیناتی اور ممبئی کی طرز پر وار روم بنانے کا مطالبہ کیا۔ 
 معلوم ہوکہ ممبئی ناسک نیشنل ہائی وے پر ٹریفک جام نے سنگین شکل اختیار کر لی ہے۔ اس سلسلے میں نائب وزیر اعلیٰ اجیت پوار نے جمعرات کو منترالیہ میں میٹنگ کی تھی۔ اس میٹنگ میں عوامی نمائندوں کے ساتھ افسران کے ذریعہ شاہراہ کا معائنہ کرنے کا فیصلہ کیا گیاتھا۔ میٹنگ میں اجیت پوار نے مشورہ دیا تھا کہ اگر ۱۰؍ دن کے اندر تعطل کاحل نہیں نکلا توافسران کو معطل کردیا جائے گا اور جانچ ہونے تک ٹول کی وصولی بند کرنے کی تجویز بھی پیش کی جائے گی۔ 

یہ بھی پڑھئے:ہندوستان کا ترقی یافتہ ملک بننےکا خواب جلد پورا نہیں ہوگا

جس کے مطابق بھیونڈی مشرقی حلقہ کے رکن اسمبلی رئیس شیخ کے ساتھ ایم ایس آر ڈی سی کے ڈائریکٹر انیل کمار گائیکواڑ، نیشنل ہائی وے اتھاریٹی کے ریجنل آفیسر انشومن سریواستو، محکمہ تعمیرات عامہ کے سیکریٹری سنجے دسپوتے، تھانے ہائی وے سیفٹی ڈیپارٹمنٹ کے سپرنٹنڈنٹ آف پولیس منوہر دہیکر، محکمہ تعمیرات عامہ کے سپرنٹنڈنٹ انجینئر سدھیر تامبے، ٹریفک کے ڈی سی پی وجے راٹھوڑ نے جمعہ کو ممبئی ناسک قومی شاہراہ کا معائنہ کیا۔ اس دوران رئیس شیخ نے کہا کہ ممبئی سے ناسک تک سڑک بری طرح خراب ہو چکی ہے۔ اسکے سبب ٹریفک جام ہے۔ جس کی وجہ سے مسافروں کو شدید پریشانیوں کا سامنا کرنا پڑرہا ہے۔ انہوں نے مطالبہ کیا آئندہ ۱۰؍ دنوں میں خراب سڑکوں کو بہتر کیا جائے۔