راجستھان میں بی جے پی کی سر پرست تنظیم آر ایس ایس سے منسلک ایک ہندوتوا تنظیم پاکستان سے آنے والے ہندو پناہ گزینوں کو شہریت کیلئے اہل ہونے والے سرٹیفکیٹ جاری کرنے کیلئے کیمپوں کا اہتمام کر رہی ہے۔ واضح رہے کہ گجرات میں بھی ایسا کیا جاچکا ہے۔

 دی ہندو کی ایک رپورٹ کے مطابق راجستھان میں حکمراں بھارتیہ جنتا پارٹی (بی جے پی) کی سر پرست تنظیم، راشٹریہ سویم سیوک سنگھ (آر ایس ایس) سے منسلک ایک ہندوتوا جماعت پاکستان سے آنے والے ہندو پناہ گزینوں کو شہریت کے سرٹیفکیٹ جاری کرنے کیلئے کیمپوں کا اہتمام کر رہی ہے۔ گروپ سیماجن کلیان سمیتی، نے دعویٰ کیا ہے کہ اس نے جیسلمیر، باڑمیر اور جودھپور اضلاع میں رہنے والے ایسے ۳۳۰؍ پناہ گزینوں کی شہریت کی ویب سائٹ پر اپنی درخواستیں داخل کرنے میں مدد کی ہے جو گزشتہ ماہ مرکزی وزارت داخلہ کی طرف سے شروع کی گئی تھی۔ سمیتی اپنے کام کی بھرپور تشہیر کر رہی ہے۔ 
اہلیت کا سرٹیفکیٹ، جو مقامی طور پر معروف کمیونٹی ادارے یا مقامی مذہبی پیشوا کے ذریعے جاری کیا جا سکتا ہے، متعدد دستاویزات میں شامل ہے جو متنازع شہریت ترمیمی قانون کے تحت درخواست دہندگان کو ہندوستانی شہریت حاصل کرنے کیلئے درکار ہیں۔ دستاویز درخواست گزار کے مذہب کی توثیق کرتی ہے اور اس بات کی توثیق کرتی ہے کہ وہ عقیدے کی پیروی جاری رکھے ہوئے ہے۔ 

یہ بھی پڑھئے: ہندوستان میں عام انتخابات کے بعد دونوں ممالک کے باہمی تعلقات بہتر ہوسکتے ہیں: آصف خواجہ

وکرم سنگھ راج پروہت، ایک وکیل اور گروپ کے ایک رکن، نے دی ہندو کو بتایا کہ ’’ہمارے ایک منتری (عہدے دار)، تریبھون سنگھ راٹھور اہلیت کے سرٹیفکیٹ پر دستخط کر رہے ہیں۔ ‘‘ راٹھور نے کہا کہ سیماجن کلیان سمیتی، ایک رجسٹرڈ معاشرہ پر مبنی تنظیم ہونے کے ناطے ایکٹ کے تحت اہلیت کے سرٹیفکیٹ جاری کرنے کی اہل ہے۔ 
شہریت ترمیمی قانون کا مقصد بنگلہ دیش، افغانستان اور پاکستان سے تعلق رکھنے والے چھ اقلیتی مذہبی برادریوں، ہندوؤں، سکھوں، بدھسٹ، جین، پارسیوں اور عیسائیوں کے پناہ گزینوں کو شہریت کا تیز رفتار راستہ فراہم کرنا ہے، اس شرط پر کہ وہ ہندوستان میں چھ سال سے مقیم ہیں۔ اور ۳۱؍ دسمبر ۲۰۱۴ءتک ملک میں داخل ہوئے ہیں۔ 
مسلمانوں کے خلاف امتیازی سلوک کیلئے اس ایکٹ پر بڑے پیمانے پر تنقید کی گئی ہے، جنہیں ڈر ہے کہ اس قانون کو شہریوں کے قومی رجسٹر کے ساتھ مل کر انہیں ہراساں کرنے اور حق رائے دہی سے محروم کرنے کیلئے استعمال کیا جا سکتا ہے۔ نیشنل رجسٹر آف سٹیزنز غیر دستاویزی تارکین وطن کی شناخت کیلئے ایک مجوزہ مشق ہے۔ 
قوانین کے تحت شہریت کیلئے آن لائن درخواستوں پر کارروائی کیلئے ایک بااختیار کمیٹی اور ضلعی سطح کی کمیٹیاں بنائی جائیں گی۔ ضلعی سطح کی کمیٹیاں پہلے درخواست کی اسکریننگ کریں گی اور پھر اسے بااختیار کمیٹی کے پاس بھیجیں گی، جو آخر میں انہیں منظور یا مسترد کر دے گی۔ 
درخواست دہندگان کو دو طرح کے ثبوت پیش کرنے کی ضرورت ہے: ایک دستاویز اپنے آبائی ملک کو ثابت کرنے کیلئے اور دوسرا یہ ثابت کرنے کیلئے کہ وہ ۳۱؍ دسمبر۲۰۱۴ء کی حتمی تاریخ سے پہلے ہندوستان میں داخل ہوا تھا۔