وزیردفاع نے ’کوسٹ گارڈ انویسٹی چر‘ تقریب میں اہلکاروں کو بہادری کیلئے تمغوں سے نوازتے ہوئے کہاکہ انہیں سائبر حملوں، ڈیٹا کی چوری اور جی پی ایس کے دھوکے جیسے کئی خطرات کا سامنا ہے۔

وزیر دفاع راج ناتھ سنگھ نے کوسٹ گارڈ کے بہادر اہلکاروں کو ایوارڈ سے نوازتے ہوئے کہا کہ وہ سائبر حملوں، ڈیٹا کی چوری، سگنل اور ریڈار جیمنگ جیسے غیر روایتی چیلنجوں سے نمٹنے کیلئے جدید ٹیکنالوجی کو اپنائیں اور ان حالات سے نمٹنے کیلئے ہمیشہ تیار رہیں۔ انہوں نےیہاں ’کوسٹ گارڈ انویسٹی چر‘ تقریب میں۳۲؍ اہلکاروں کو بہادری، ممتاز خدمات اور شاندار خدمات کیلئے تمغوںسے نوازا۔ اس موقع پر وزیر دفاع نے کمانڈنٹ سوربھ (بعد از مرگ) کو سلام پیش کیا اور انہیں خراج عقیدت پیش کیا، جنہیں بہادری کیلئے کوسٹ گارڈ میڈل سے نوازا گیا تھا۔
 راج ناتھ سنگھ نے کہا کہ بدلتے وقت کے ساتھ کوسٹ گارڈ کو درپیش چیلنجز بھی بدل رہے ہیں، اسلئےفورس کو ہمیشہ خود کو ان سے نمٹنے کے قابل بنا کر تیار رہنا چاہئے۔ انہوں نے کہا کہ ’’آپ سب ہمیشہ سے ان روایتی خطرات سے نمٹنے کیلئے پوری طرح سے الرٹ ر ہے ہیں جو ہمارے سامنے برسوں سے اُبھرے ہیں، لیکن جیسے جیسے وقت بدل رہا ہے، اب ہمیں مختلف قسم کے حالات کا سامنا ہے۔ جدید ٹیکنالوجی کے اس دور میں ہمیں ایسے چیلنجز کا بھی سامنا ہے جو کہ غیر روایتی ہیں۔ کوسٹ گارڈ کو سائبر حملوں، ڈیٹا کی چوری، سگنل جیمنگ، راڈار کی مداخلت اور جی پی ایس کے دھوکے جیسے کئی تکنیکی خطرات کا سامنا ہے۔ ان سے بھی نمٹنے کی ضرورت ہے۔‘‘

یہ بھی پڑھئے: منترالیہ میں کسان کی خودکشی کی کوشش، ساتویں منزلہ سے حفاظتی جال پرگرا

وزیردفاع نے کہا کہ اس کا مطلب یہ ہے کہ ایک طرف کوسٹ گارڈ کو روایتی خطرات کا سامنا ہے تو دوسری طرف نئے ابھرتے ہوئے خطرات بھی ہیں، یعنی  آپ کو دونوں طریقوں سے محتاط رہنے کی ضرورت ہے۔ انہوںنے کہا کہ ایک مضبوط اور خوشحال ہندوستان کا راستہ جس کا مستقبل میں تصور کیا جا رہا ہے تمام قوتوں کو بااختیار بنانے  میں  ہی مضمر ہے۔  انہوں نے کہا کہ ’’میں دیکھتا ہوں کہ ہماری مضبوط سیکوریٹی مضبوط زراعت، مضبوط تعلیم، مضبوط صحت، مضبوط معیشت، مضبوط سائنس اور ٹیکنالوجی اور مجموعی قومی اور سماجی بااختیاریت سے جڑی ہوئی ہے۔ ہمارے خوابوں کا ہندوستان تب ہی مضبوط ہوگا جب ہمارا سیکوریٹی سسٹم اور ہماری سیکوریٹی فورسیز مضبوط ہوں گی۔  راج ناتھ سنگھ نے کہا کہ حکومت کوسٹ گارڈ کی کارکردگی کو بڑھانے کیلئے پابند عہد ہے۔ کوسٹ گارڈ کو ۲۶۔۲۰۲۵ء کیلئے ۹؍ ہزار ۶۷۶؍کروڑ روپے مختص کئے گئے ہیں، جو پچھلے سال کے بجٹ سے ۲۶ء۶۰؍ فیصد زیادہ ہے۔ یہ کوسٹ گارڈ کو جدید بنانے کی طرف ایک بہت اہم قدم ہے۔ انہوں نے کہا کہ کوسٹ گارڈکیلئے ۱۴؍ گشتی کشتیوں،۶؍ ایئر کشن وہیکلز،۲۲؍ انٹرسیپٹر بوٹس،۶؍ آف شور گشتی جہاز اور  اگلی پیڑھی کی۱۸؍ گشتی کشتیوں کی خریداری کی منظوری دی گئی ہے۔ اس سے مستقبل میں کوسٹ گارڈ کی صلاحیت اور طاقت دونوں میں اضافہ ہوگا۔
  وزیر دفاع نے کہا کہ خود کوسٹ گارڈ نے بھی تکنیکی ترقی پر توجہ مرکوز کی ہے اور مہی پال پور میں ڈیجیٹل کوسٹ گارڈ پروجیکٹ کی بنیاد رکھی ہے۔ ان تمام کوششوں سے کوسٹ گارڈ کو تقویت ملے گی اور یہ روایتی اور غیر روایتی خطرات سے موثر انداز میں نمٹ سکے گا۔ انہوں نے یقین دلایا کہ حکومت ہمیشہ کوسٹ گارڈ کے ساتھ کھڑی ہے۔انہوں  نے کہا کہ کوسٹ گارڈ کے اہلکار نامساعد حالات میں ساحلی حفاظت کے ساتھ ساتھ مختلف ریسکیو آپریشنز میں بہادری سے کام کر رہے ہیں۔ انہوں نے کہا کہ کوسٹ گارڈ آج اپنے قیام کے بعد سے ایک ناقابل تسخیر قوت بن چکا ہے۔ اس فورس نے دنیا بھر میں اپنی الگ پہچان بنائی ہے۔ اس موقع پر وزیر مملکت برائے دفاع سنجے سیٹھ، دفاعی سیکریٹری راجیش کمار سنگھ، کوسٹ گارڈ کے ڈائریکٹر جنرل پرمیش سیومانی اور دیگر سینئر افسران بھی موجود تھے۔