ایس آر اے نے خواتین میں صنفی مساوات کے فروغ اور انہیں مالی تحفظ دینے کیلئے یہ فیصلہ کیا۔

 ’سلم ری ہیبیلیٹیشن اتھاریٹی‘ نے ایک سرکیولر جاری کیا ہے جس میں جھوپڑوں کی بازآبادکاری سے ملنے والے مکان کے رجسٹریشن میں شوہر کے ساتھ بیوی کا نام بھی مالک کے طور پر شامل کرنا لازمی قرار دے دیا گیا ہے۔ ایس آر اے سربراہ کے مطابق جھوپڑپٹیوں میں رہنے والی خواتین کیلئے صنفی مساوات کو فروغ دینے، مساوی حقوق اور ان کے مالی تحفظ کو یقینی بنانے کے مقصد سے یہ قدم اٹھایا گیا ہے۔  ایس آر اے نے سرکیولر نمبر ۲۲۲؍ میں ایس آر اے کے تحت جھوپڑوں کی بازآباد کاری کی اسکیم کی تفصیلات بتاتے ہوئے وضاحت کی ہے کہ ایس آر اے کے تحت اب جن جھوپڑوں کی جگہ نئے مکان دیئے جائیں گے ان کے رجسٹریشن میں شوہر اور بیوی دونوں کا نام شامل کرنا لازمی ہوگا۔

یہ بھی پڑھئے: منترالیہ میں کسان کی خودکشی کی کوشش، ساتویں منزلہ سے حفاظتی جال پرگرا

سرکاری ایجنسی کے مطابق اس سرکیولر کے بنیادی مقاصد میں جائیداد کے مشترکہ رجسٹریشن کو لازمی قرار دینا، خواتین کو قانونی حقوق فراہم کرنا اور ازدواجی تنازعہ یا شوہر کی موت کی صورت میں انہیں تحفظ فراہم کرنا شامل ہے۔اس کے علاوہ یہ بھی دیکھا گیا ہے کہ شوہر کی موت کے بعد ملکیت میں اپنا حق حاصل کرنے کیلئے بیوائوں کو بہت سی قانونی دشواریوںکا سامنا کرنا پڑتا ہے۔ اگر پہلے ہی ان دونوں کا نام ملکیت کے دستاویز پر موجود ہوگا تو خواتین کو اس طرح کی پریشانیوں کا سامنا نہیں کرنا پڑےگا۔
 اس سلسلے میں سلم ری ہیبیلیٹیشن اتھاریٹی  کے چیف ایگزیکٹیو آفیسر ڈاکٹر مہندر کلیانکر نے کہا کہ ’’یہ اقدام خواتین کی املاک کے حقوق کے تحفظ کی جانب ایک اہم قدم ہے۔ ملکیت میں مشترکہ حق ملنے سے انہیں قانونی شناخت اور تحفظ ملے گا۔‘‘ اس تعلق سے حکام کو ہدایات دی گئی ہیں کہ وہ جھوپڑوں کی بازآباد کاری کے تحت تعمیر کئے گئے فلیٹ کو ان کے مالکان کو دیتے وقت اس بات کو یقینی بنائیںکہ ان کے ’الاٹمنٹ لیٹر‘ پر دونوں کے نام درج ہوں۔