سعودی عرب کی وزارت برائے حج و عمرہ نے فیصلہ کیا ہے کہ اب چھوٹے بچوں کو حج کی اجازت نہیں دی جائے گی۔ یہ فیصلہ ہر سال حج کے دوران بڑھتی ہوئی بھیڑ کو پیش نظر رکھتے ہوئے کیا گیا ہے۔اس کے علاوہ سعودی عرب کے ذریعہ اپنے ویزا اصولوں میں کچھ بڑی تبدیلیاں بھی کی گئی ہیں جو خاص طور سے۱۴؍ ممالک کیلئے ہیں۔

سعودی عرب میں جب ہر سال فریضۂ حج ادا کیا جاتا ہے تو اس دوران کئی افراد اپنے ساتھ چھوٹے بچوں کو بھی لے جاتے ہیں لیکن اب وہ ایسا نہیں کر پائیں گے کیونکہ سعودی عرب نے اس پر پابندی عائد کر دی ہے۔ سعودی عرب کی وزارت برائے حج و عمرہ نے فیصلہ کیا ہے کہ اب چھوٹے بچوں کو حج کی اجازت نہیں دی جائے گی۔ یہ فیصلہ ہر سال حج کے دوران بڑھتی ہوئی بھیڑ کو پیش نظر رکھتے ہوئے کیا گیا ہے۔ بچوں کو تحفظ فراہم کرنے کے مقصد سے یہ قدم وزارت حج و عمرہ نے اٹھایا ہے۔سعودی عرب کے ذریعہ اپنے ویزا اصولوں میں کچھ بڑی تبدیلیاں بھی کی گئی ہیں جو  خاص طور سے۱۴؍ ممالک کیلئے ہیں۔ 

یہ بھی پڑھئے: مسجد نبویؐ میں افطار کرانےکیلئے نئے قوانین متعارف کرائے گئے

اطلاعات کے مطابق حکومت سعودی عرب نے۱۴؍ ممالک کے ساتھ سیاحت، تجارت اوراسفار کیلئے ایک سال کے ملٹی پل انٹری ویزا (ایک سے زیادہ مرتبہ داخلہ کی اجازت والا ویزا) کو غیر معینہ مدت کیلئے معطل کر دیا ہے۔ اس نئے ویزا اصولوں سے ہندوستان، پاکستان، الجیریا، بنگلہ دیش، مصر، اتھوپیا، انڈونیشیا، عراق، اردن، مراکش، نائیجیریا، سوڈان، تیونیشیا اور یمن اثر انداز ہوں گے۔ نئے اصولوں کے تحت ان ممالک کے لوگ صرف سنگل انٹری ویزا کیلئے درخواست داخل کر سکتے ہیں جو ۳۰؍ دنوں کیلئے قابل قبول ہوگا۔قابل ذکر ہے کہ سعودی عرب حج و عمرہ سے متعلق اپنے اصولوں میں تبدیلیاں کرتا رہتا ہے۔

یہ بھی پڑھئے: ایلون مسک کی اوپن اے آئی کو خریدنے کیلئے۴ء۹۷؍ بلین ڈالر کی پیشکش

۲۰۲۴ء میں سعودی عرب نے عمرہ کے دوران مسجد الحرام کے پاس ہجوم ہونے کے سبب فوٹوگرافی سے لوگوں کو بچنے کا مشورہ دیا تھا۔ وزارت نے بغیر اجازت کسی کی تصویر لینے اور زیادہ دیر تک مسجد الحرام کے پاس فوٹوگرافی کرنے سے پرہیز کرنے کو کہا تھا۔اس درمیان سعودی عرب میں حج کیلئے رجسٹریشن کا عمل بھی شروع ہو گیا ہے۔ سعودی عرب کی حج و عمرہ وزارت کا کہنا ہے کہ۲۰۲۵ء میں انہی لوگوں کو ترجیح دی جائے گی جو پہلی مرتبہ حج کرنے آئے ہیں۔ بچوں پر پابندی بھی اسی وجہ سے لگائی گئی ہے کہ انہیں بھیڑ بھاڑ میں ہونے والی مشقتوں سے بچایا جاسکے۔ حج۲۰۲۵ءکیلئے رجسٹریشن شروع ہو چکا ہے اور سعودی عرب کے شہری اور وہاں مقیم افراد’نسک ایپ‘(Nusuk) کے ذریعہ یا سرکاری آن لائن پورٹل کے ذریعہ اپنا رجسٹریشن کرا سکتے ہیں۔ درخواست دہندہ کو اپنی جانکاری کی تصدیق کرانے کے ساتھ ہی ان کے ساتھ سفر کرنے والے کا بھی رجسٹریشن کرنا ہوگا۔