جنوبی کوریا کی ایک عدالت نے حکومت کے اس منصوبےکے حق میں فیصلہ دیا ہے جس کے تحت طبی اسکولوں میں اگلے سال سے طلبہ کے اندراج میں ۲۰۰۰؍ کا اضافہ کیا جائے گا۔ حکومت کے اس فیصلے کے خلاف ملک کے ۱۰؍ ہزار ڈاکٹروں نے ہڑتال کر رکھی ہے جن کی دلیل ہے کہ اس سے تعلیم کا معیار اور دیگر سہولیات متاثر ہوں گی۔

 میڈیا رپورٹس  کے مطابق جنوبی کوریا کی ایک عدالت نے جمعرات کو میڈیکل اسکولوں میں داخلوں میں زبردست اضافہ کرنے کے حکومتی منصوبے کے حق میں فیصلہ دیا۔ یونہاپ نیوز ایجنسی کی خبر کے مطابق، سیول ہائی کورٹ نے ہڑتالی ڈاکٹروں اور دیگر کی جانب سے حکومت کے بھرتی کے منصوبے کو معطل کرنے کیلئے دائر حکم امتناعی کو مسترد کرتے ہوئے یہ فیصلہ جاری کیا۔ دیگر مقامی میڈیا نے بھی ایسی ہی رپورٹیں دیں۔

یہ بھی پڑھئے: نائیجیریا: مسجد پر حملہ، ۸؍ افراد جاں بحق، حملے کی وجہ خاندانی رنجش

ڈاکٹروں سے توقع کی جارہی ہے کہ وہ اس فیصلے کے خلاف ملک کی اعلیٰ ترین عدالت سپریم کورٹ میں اپیل کریں گے۔واضح رہے کہ دس ہزارسے زیادہ جونیئر ڈاکٹرز فروری سے ملک کے میڈیکل اسکول کے اندراج کوٹہ کو ۳؍ہزار ۵۸؍کی موجودہ حدمیں اگلے سال سے۲۰۰۰؍ کا اضافہ  کرنے کے حکومتی منصوبے کے خلاف ہڑتال پر ہیں۔