ڈرائیور نے مزید ۸؍گاڑیوں کو بھی ٹکر ماری،ڈرائیور کو پولیس نے حراست میں لیا۔

یہاں کے کھونی علاقے میں پلاوا ہاؤسنگ سوسائٹی کے قریب ایک تیز رفتار ٹیمپو نے زومیٹو ڈیلیوری بوائے سمیت سڑک کے کنارے کھڑی ۸ موٹر سائیکلوں کو زور دار ٹکر مار دی۔ اس افسوسناک حادثہ میں نوجوان کی جائے وقوعہ پر ہی موت واقع ہوگئی۔ بتایا جارہا ہے ٹیمپو کے ڈرائیور نے کلنیر کو گاڑی چلانے دی تھی جسے ڈرائیونگ کا کوئی تجربہ نہیں تھا۔ اس معاملے میں مانپاڑہ پولیس نے لاپروائی سے گاڑی چلانے والے کلینر کو گرفتار کرلیا ہے۔ 

یہ بھی پڑھئے: شری کانت شندے نےمہایوتی کے امیدواروں کی شکست کا ذمہ دار مسلمانوں کو قرار دیا!

اطلاع کے مطابق گاڑیوں کی صفائی کیلئے پانی سپلائی کرنے والے ٹیمپو کے ڈرائیور نے اپنے کلینر کو گاڑی چلانے کیلئے دی تھی۔ کلینر کے پاس گاڑی چلانے کا کوئی لائسنس اور تجربہ نہیں تھا۔ سنیچر کی شب انتہائی غیر ذمہ داری سے ٹیمپو چلانے والے کلینر نے پلاوا ہاؤسنگ کمپلیکس کے پاس زومیٹو ڈیلیوری بوائے سوربھ یادو کو پہلے ٹکر ماری اور پھر تقریباً ۲۰۰ میٹر تک اسے گھسیٹا ہوا لے گیا۔ اس حادثہ میں نوجوان کی جائے وقوعہ پر ہی موت ہوگئی۔ عینی شاہدین کے مطابق ٹیمپو ڈرائیور نے سڑک کے کنارے کھڑی ۸ ؍موٹر سائیکلوں کو بھی نقصان پہنچایا۔ حادثہ کی اطلاع ملتے ہی مانپاڑہ پولیس جائے وقوعہ پر پہنچی اور ٹیمپو کے کلینر آتش جادھو کو گرفتار کیا۔ حادثہ میں ایک بے گناہ نوجوان کی جان چلی گئی اور ۸ ؍موٹرسائیکلوں کو بھی نقصان پہنچا مشتعل شہریوں نے کلینر سمیت ڈرائیور کیخلاف سخت کارروائی کا مطالبہ کیا ہے۔