جرمنی کے دورے پر گئے برطانیہ کے وزیر اعظم کئیر اسٹارمر نے کہا کہ حماس لیڈر یحیٰ سنوار کی موت خطے میں جنگ بند کرنے کا بہترین جواز ہے، ساتھ ہی انہوں نے کہا کہ غزہ میں ایسے حالات مزید جاری نہیں رکھے جا سکتے، اسرائیل کو مزید امداد کی ترسیل کی اجازت دینی ہوگی۔

برطانیہ کے وزیر اعظم کئیر اسٹارمر نے اپنے جرمنی کے دورے کے دوران کہا کہ غزہ میں اسرائیلی فوج کے ہاتھوں ہلاک ہونے والے حماس سربراہ یحیٰ سنوار کی موت جنگ کو ختم کرنے کا بہترین جواز ثابت ہو سکتی ہے۔ واضح رہے کہ یحیٰ سنوار نے ۷؍ اکتوبر کو اسرائیل پر ہوئے حملے کی منصوبہ بندی کی تھی اور اسے عملی طور پر انجام دیا تھا۔ان کی شہادت رفع میں ہوئے ایک اسرائیلی حملے کے نتیجے میں ہوئی تھی۔اسٹارمر نے  فرانس کے صدر میکرون، جرمن چانسلراولاف شولز، او ر امریکی صدر جو بائیڈن سے ملاقات کے بعد کہا کہ ہم جس جنگ بندی کا مطالبہ کر رہے تھے ،سنوار کی موت اس کیلئے بہترین موقع ہے،امن قائم کرنے کا ، اور حما س کے بنا غزہ کے بہتر مستقبل کا۔ انہوں نے کہا کہ تمام اتحادی مل کر خطے میں جنگ بندی کیلئے کام کریں گے، کیونکہ جنگ خطے کے مسائل کا حل نہیں ہے،مسلے کا فقط سفارتی حل ہے۔ اسٹارمر نےمزید کہا کہ ’’ غزہ میں سنگین صورتحال ہمیشہ جاری نہیں رکھی جا سکتی، اسرائیل کو چاہئے کہ غزہ میں مزید خوراک کی ترسیل کی اجازت دے۔اب دنیا مزید انسانی بحران کی اجازت نہیں دے گی۔ شمالی غزہ کے عوام کو فوری طور پر غذا کی ضرورت ہے۔‘‘ واضح رہے کہ سیاست میں قدم رکھنے سے پہلے اسٹارمر انسانی حقوق کے وکیل تھے۔ 

یہ بھی پڑھئے: اسرائیل: وزیر اعظم بنجامن نیتن یاہو کی رہائش گاہ پر ڈرون حملہ

اسٹارمر کا یہ بیان برطانیہ کی ڈیزاسٹر ایمرجنسی کمیٹی کی غزہ، لبنان، اور مغربی کنارے کے عوام کی مدد کی اپیل کے دوران آیا۔ اس کمیٹی نے اپیل کے پہلے ہی دن ساڑھے گیارہ ملین امریکی ڈالر کا چندہ اکٹھا کر لیا ۔واضح رہے کہ یہ کمیٹی ۱۵؍ رفاہی ادارے چلاتی ہے، جس میں’’ اکسفام ‘‘اور’’ ایکشن ایڈ‘‘ شامل ہیں۔یہ کمیٹی بین الاقوامی سطح پر بحران اور آفات کی صورت میں قومی چندے کی اپیل کرتی رہتی ہے۔ اپنے بیان میں کمیٹی نے کہا کہ’’ ان کی چندے کی اپیل پر سب سے پہلے برطانیہ کے سربراہ مملکت کنگ چارلس سوم اور ان کی اہلیہ کمیلا نے عطیہ دیا۔‘‘