اقوام متحدہ کے ہائی کمشنر برائے مہاجرین فلیپو گرانڈی کے مطابق شام میں اسد حکومت کے خاتمے کے بعد سے دو لاکھ ۸۰؍ ہزار شامی مہاجرین اور ملک کے اندر بے گھر ہونے والے ۸؍ لاکھ سے زیادہ لوگ اپنے گھروں کو لوٹ چکے ہیں۔

اقوام متحدہ نے منگل کو کہا کہ شام میں بشار الاسد کی حکومت کے خاتمے کے بعد ۱۰؍لاکھ سے زائد افراد اپنے گھروں کو واپس جا چکے ہیں، جن میں ۲؍لاکھ ۸۰؍ ہزار مہاجرین بھی شامل ہیں جو بیرون ملک سے واپس آئے تھے۔اسد حکومت کو دسمبر میں باغیوں نے گرا دیا تھا، جس کے بعد ۲۰۱۱ء سے جاری خانہ جنگی کا خاتمہ ہوا۔ اس جنگ میں۵؍ لاکھ سے زائد شامی باشندے ہلاک اور لاکھوں بے گھر ہو چکے ہیں۔

یہ بھی پڑھئے: امریکہ: فلسطینی کمپنی نے فلسطین کے نام کو زندہ رکھنے کیلئے فلسطین کولا لانچ کیا

اسلام پسند باغی جنہوں نے جارحانہ انداز میں اسد کو معزول کیا تھا بین الاقوامی برادری کو یقین دلانے کی کوشش کر رہے ہیں کہ وہ اپنے ماضی سےپلٹ چکے ہیں اور اقلیتوں کے حقوق کا احترام کریں گے۔  فلیپو گرانڈی نے ایکس پر لکھا کہ ’’ ابتدائی بحالی کی کوششیں زیادہ جرات مندانہ اور تیز تر ہونی چاہئیں، بصورت دیگر لوگ دوبارہ لوٹ جائیں گے۔ فروری کے وسط میں پیرس میں ہونے والی ایک میٹنگ میں، عرب ممالک، ترکی، برطانیہ، فرانس، جرمنی، کینیڈا اور جاپان سمیت تقریباً ۲۰؍ممالک نے پیرس میں ایک کانفرنس کے اختتام پر اتفاق کیا کہ ’’شام کی قیادت میں منتقلی کی کامیابی کو یقینی بنانےکیلئےمل کر کام کریں گے۔‘‘
اجلاس کے آخری بیان میں شام کے نئے حکام کی ہر قسم کی دہشت گردی اور انتہا پسندی کے خلاف جنگ میں حمایت کا وعدہ بھی کیا گیا تھا۔