پاکستانی وزیراعظم شہباز شریف نے ہندوستان سے آرٹیکل ۳۷۰ کو منسوخی کے فیصلہ کو واپس لینے اور پرامن حل کیلئے گفتگو میں شامل ہونے کا مطالبہ کیا۔ ہندوستان نے پاکستان پر دہشت گردی کی حمایت کا الزام لگایا۔

اقوام متحدہ کی جنرل اسمبلی میں جمعہ کو ہندوستان اور پاکستان کے درمیان متنازع کشمیر کے مسئلہ پر گرما گرم بحث ہوئی۔ پاکستانی وزیر اعظم شہباز شریف نے ہندوستان پر الزام لگایا کہ وہ، اقوام متحدہ کی سلامتی کونسل کی کشمیر سے متعلق قراردادوں پر عمل درآمد کرنے کے اپنے وعدوں کو پورا کرنے میں ناکام رہا ہے۔ 
نیویارک میں جاری اقوام متحدہ کی جنرل اسمبلی کے ۷۹ ویں اجلاس کے دوران شریف نے کہا کہ فلسطینی عوام کی طرح جموں و کشمیر کی عوام نے بھی اپنی آزادی اور حق خود مختاری کیلئے ایک صدی تک جدوجہد کی ہے۔ امن کی طرف پیش قدمی کرنے کی بجائے ہندوستان اپنے وعدوں سے مکر گیا ہے۔ شہباز شریف نے ہندوستان سے آرٹیکل ۳۷۰ کو منسوخی کے فیصلہ کو واپس لینے اور پرامن حل کیلئے گفتگو میں شامل ہونے کا مطالبہ کیا۔

یہ بھی پڑھئے:اسرائیل کا حزب اللہ کے لیڈر حسن نصراللہ اور شام میں حماس لیڈر کی موت کا دعویٰ

اقوام متحدہ میں ہندوستانی مستقل وفد کی فرسٹ سکریٹری بھاویکا منگلانندن نے پاکستان کے الزامات کا سخت جواب دیا۔ منگلاںندن نے کہا کہ یہ افسوسناک ہے کہ دہشت گردی، منشیات کی تجارت اور بین الاقوامی جرائم کے حوالے سے عالمی شہرت رکھنے والا اور فوج کے زیر انتظام ملک، آج دنیا کی سب سے بڑی جمہوریت پر حملہ کرنے کی جرأت کررہا ہے۔ منگلانندن نے پاکستان پر سرحد پار دہشت گردی کی حمایت کا الزام لگاتے ہوئے کہا کہ پاکستان نے ہندوستان کی پارلیمنٹ، مالیاتی دارالحکومت ممبئی، بازاروں اور مذہبی یاترا کے راستوں پر حملہ کیا ہے۔ یہ فہرست کافی طویل ہے۔
شریف نے مزید الزام لگایا کہ بھارت کشمیریوں کو دہشت زدہ کرنے کیلئے ۹ لاکھ فوجیوں کا استعمال کر رہا ہے۔ شریف نے مزید کہا کہ ہندوستان نوآبادیاتی منصوبہ کے ذریعہ کشمیر کی آبادی کو تبدیل کرنا چاہتا ہے لیکن یہ منصوبہ خدا کے فضل سے ناکام ہوگا۔ منگلاںندن نے پاکستان کے دعووں کو بے بنیاد اور گمراہ کن قرار دیا۔ انہوں نے زور دے کر کہا کہ پاکستان جیسے ملک کیلئے تشدد کے بارے میں بات کرنا بدترین منافقت ہے۔