پوجا کھیڈکر کووجہ بتاؤ نوٹس کا جواب دینے کیلئے ۳۰؍ جولائی تک کا وقت دیا گیا تھا۔ مگر وہ مقررہ وقت کے اندر اپنی وضاحت پیش کرنے میں ناکام رہی۔ اسے کمیشن کی طرف سے منعقد ہونے والے کسی بھی امتحانات سے مستقل طور پر روک دیا گیا ہے۔

یونین پبلک سروس کمیشن نے ٹرینی آئی اے ایس آفیسر پوجا کھیڈکر کا انتخاب منسوخ کر دیا ہے۔ اس کے علاوہ ان پر مستقبل میں کمیشن کی طرف سے منعقد ہونے والے کسی بھی امتحان میں شرکت پر بھی پابندی عائد کر دی گئی ہے۔ یو پی ایس سی نے انہیں متعدد بار فرضی شناخت کا استعمال کرتے ہوئے امتحانات میں شرکت کرنے کا قصوروار پایا ہے۔ یو پی ایس سی نے ایک بیان میں کہا ہے کہ کھیڈکر کو سول سروسیز امتحان کے قواعد کی خلاف ورزی کا قصوروار پایا گیا ہے۔ پوجا منورما دلیپ کھیڈکر، ۱۸؍ جولائی۲۰۲۴ء کو سول سروسیز امتحان-۲۰۲۲ءکیلئے عارضی طور پر تجویز کردہ امیدوار، کو یونین پبلک سروس کمیشن نے دھوکہ دہی کیلئے وجہ بتاؤ نوٹس جاری کیا ہے۔ اپنی فرضی شناخت دکھا کر اس نے امتحانی قواعد میں دی گئی جائز حد سے زیادہ کوششیں کی تھیں۔ بیان میں کہا گیا ہے کہ کھیڈکر کو ۲۵؍ جولائی تک نوٹس کا جواب دینا تھا، لیکن انہوں نے ۴؍اگست تک کا وقت مانگا ہے۔ یو پی ایس سی نے انہیں ۳۰؍ جولائی تک کا وقت دیا اور واضح کیا کہ یہ آخری موقع ہے۔ اوروقت کی مزید توسیع کی اجازت نہیں ہوگی۔ پینل کی طرف سے یہ بھی بتایا گیا کہ اگر آخری تاریخ تک کوئی جواب نہیں ملتا ہے تو یو پی ایس سی کارروائی کرے گی۔ پینل نے ایک بیان میں کہا، اس کی آخری تاریخ میں توسیع کے باوجود، وہ مقررہ وقت کے اندر اپنی وضاحت پیش کرنے میں ناکام رہی۔ یو پی ایس سی نے کہا ہے کہ دستیاب ریکارڈ کا بغور جائزہ لیا گیا۔ وہ سی ایس ای-۲۰۲۲ء قواعد کی دفعات کی خلاف ورزی کرتے ہوئے کام کرنے کی قصوروار پائی گئی ہے۔ اس کی عارضی امیدواری منسوخ کر دی گئی ہے اور اسے مستقبل کے تمام امتحانات سے مستقل طور پر روک دیا گیا ہے۔ پینل نے کہا کہ پوجا کھیڈکر کے واقعہ کے تناظر میں، اس نے۱۵؍ ہزارسے زیادہ امیدواروں کے ڈیٹا کی جانچ کی ہے جنہوں نے ۲۰۰۹ء اور۲۰۲۳ء کے درمیان آئی اے ایس اسکریننگ کے عمل کو کلیئر کیا تھا۔ 

یہ بھی پڑھئے: پریتی سودن یونین پبلک سروس کمیشن کے چیئرپرسن کے عہدے پر فائز

اس تفصیلی مشق کے بعد، سوائے پوجا منورما دلیپ کھیڈکر کے کوئی دوسرا امیدوار سی ایس ای کے قوانین کے تحت اجازت سے زیادہ کوششوں کا فائدہ اٹھاتے ہوئے نہیں پایا گیا ہے۔ کمیشن نے کہا ہے کہ پوجا منورما دلیپ کھیڈکر کے الگ تھلگ کیس میں، یو پی ایس سی کا معیاری آپریٹنگ پروسیجر (ایس او پی) اس کی کوششوں کی تعداد کا پتہ نہیں لگا سکا، بنیادی طور پر اس حقیقت کی وجہ سے کہ اس نے نہ صرف اپنے نام کا ذکر کیا تھا بلکہ اس کی تفصیلات بھی بتائی تھیں۔ اس کے والدین کا نام بھی بدل گیا تھا۔ بیان میں کہا گیا ہے کہ یو پی ایس سی ایس او پی کو مزید مضبوط بنانے کے عمل میں ہے تاکہ اس بات کو یقینی بنایا جا سکے کہ مستقبل میں اس طرح کا معاملہ دوبارہ نہ ہو۔