اسرائیل کے ذریعے غزہ جنگ اب لبنان میں بھی پھیلنے کا خطرہ بڑھتا جا رہا ہے، اس کے خلاف امریکہ میں کئی شہروں میں مظاہرے ہوئے ، ان مظاہرین نے اسرائیل کو دئے جانے والے اسلحہ اور جنگی معاونت بند کرنے کا مطالبہ کیا۔

اسرائیل کے ذریعے غزہ جنگ اور اب اس جنگ کی مشرق وسطیٰ میں توسیع کےخدشہ کے پیش نظر جنگ مخالف تنظیموں نے امریکہ کے کئی شہروں میں مظاہرے کئے اور امریکہ کے ذریعے اسرائیل کو فراہم کئے جارہے اسلحوں پر پابندی کا مطالبہ کیا۔نیو یارک کے ہیرالڈ اسکوائر میں درجنوں مظاہرین نے لبنان جنگ مخالف نعرے لگائے۔ساتھ ہی انہوں نے نسل پرستی کی بھی مخالفت کی۔ان مظاہرین نے ’’آزاد فلسطین ‘‘ کے حق میں نعرے لگائےاور بائیڈن، ہیرس، ٹرمپ،اور نیتن یاہو کو مخاطب کرتے ہوئے کہا کہ ان کا شہر میں خیر مقدم نہیں ہے۔ اسی قسم کا ایک چھوٹا سا مظاہرہ واشنگٹن میں کیا گیا۔جس میں مظاہرین بارش میں بھی پوسٹر اور بینر لئے مظاہرہ کرتے رہے۔

یہ بھی پڑھئے: آسام: کچوتالی گاؤں میں ۱۵۰؍ خاندانوں کے گھروں پر بلڈوزر چلائے گئے

ان مظاہرین کا کہنا تھا کہ غزہ میں نسل کشی اور اب لبنان تک جنگ کی توسیع محض امریکہ کے فراہم کردہ  بموں، جنگی طیاروں، اور میزائلوں کے سبب ہی ممکن ہو سکی ہے۔انہوں نے بتایا کہ اس طرح کے مظاہرے دیگر شہروں میں بھی منعقد کئے جائیں گے، جن میں سان فرانسسکو، سیٹل، سان انٹونیو، اور فونکس اہم ہیں۔واضح رہے کہ قومی اور بین الاقوامی سطح پر مخالفت کے باوجود امریکہ نے اسرائیل کو مہلک اسلحوں کی فراہمی جاری رکھی ہے۔ 

یہ بھی پڑھئے: لبنان: اسرائیلی بہیمانہ حملوں میں شدید جانی و مالی نقصان، حزب اللہ کی جوابی کارروائی

پیر کو لبنان میں اسرائیلی حملوں میں۵۰۰؍ افراد جاں بحق ہوئے جن میں ۵۰؍ بچے شامل ہیں۔جبکہ دیگر ۱۸۰۰؍ افراد زخمی ہیں۔اسرائیل کا دعویٰ ہے کہ اس نے حزب اللہ کو نشانہ بناکر یہ حملے کئے ، جبکہ حزب اللہ نے بھی جواب میں اسرائیل پر راکٹوں سے حملہ کیا۔اس کے نتیجے میں اس جنگ کے مشرق وسطیٰ میں پھیلنے کا خطرہ بڑھتا جا رہا ہے، جو خطے میں عدم استحکام پیدا کر دے گا۔اقوام متحدہ کے متعدد ارکان اسی ہفتے امریکہ میں ملاقات کر چکے ہیں، ان ملاقات میں جنگ کا موضوع سر فہرست تھا۔