امریکی ریاست پنسلوانیا میں پبلک اسکول کے ٹیچر کو اس وقت معطل کر دیا گیا جب انہوں نے فلسطین نژاد امریکی طالب علم کو مبینہ طور پر انتہا پسند کہا۔ فلسطین نژاد امریکی طالب علم نے کلاس میں اپنی نشست بدلنے کی درخواست کی تو ٹیچر نے کہا میں دہشت گردوں سے بات نہیں کرتا۔

امریکی ریاست پنسلوانیا میں پبلک اسکول کے ٹیچر کو اس وقت معطل کر دیا گیا جب انہوں نے فلسطین نژاد امریکی طالب علم کو مبینہ طور پر انتہا پسند کہا۔ برطانوی نیوز ایجنسی روئٹرز کے مطابق مڈل اسکول کی انتظامیہ اور مسلم وکالتی گروپ کی جانب سے یہ اطلاع دی گئی ہے۔ انسانی حقوق کے حامیوں کا کہنا ہے کہ ۷؍ اکتوبر۲۰۲۳ء کو حماس کے حملے کے بعد اسرائیل کی جانب سے غزہ پر جنگ مسلط کرنے سے امریکہ میں مسلم مخالف، فلسطین مخالف اور یہودی مخالف نفرت انگیز واقعات میں شدت آئی ہے۔ سینٹرل ڈوفن اسکول انتظامیہ نے بتایاکہ گذشتہ ہفتےا سکول ٹائم کے بعد ایک پروگرام کے دوران ٹیچر پر اس الزام کے بارے میں معلوم ہوا۔ 

یہ بھی پڑھئے: چینی اے آئی ایپ نے چیٹ جی پی ٹی کیساتھ دیگرکیلئے خطرے کی گھنٹی بجا دی

انتظامیہ کی جانب سے کہا گیا ہے کہ نسل پرستانہ تبصرہ کی کوئی گنجائش نہیں ہے۔ مبینہ واقعے میں ملوث ٹیچر کو تحقیقاتی عمل کے دوران معطل رہنا ہو گا۔ امریکن اسلامک ریلیشنز کونسل نے بیان میں کہاکہ فلسطین نژاد امریکی طالب علم نے کلاس میں اپنی نشست بدلنے کی درخواست کی تو ٹیچر نے کہا میں دہشت گردوں سے بات نہیں کرتا۔ امریکن اسلامک ریلیشنز کونسل اورا سکول کی جانب سے استاد یا طالب علم کا نام ظاہر نہیں کیا گیا جبکہ اسلامک ریلیشنز کونسل طالب علم کے والدین سے رابطے میں ہے۔