گزشتہ دن امریکہ کی ۱۰؍ ریاستوں میں ’’ای کولائی‘‘ سے متاثر ہونے والے درجنوں معاملات درج کئے گئے۔ ابتدائی تفتیش سے معلوم ہوا کہ میکڈونالڈز کے برگر ’’کوارٹر پاؤنڈر‘‘ میں کا کوئی جز اس وائرس سے آلودہ ہے جس کی وجہ سے لوگوں کو فوڈ پوائزننگ کی شکایت ہورہی ہے۔ ۴۹؍ افراد شدید بیمار ہیں جبکہ ایک کی موت ہوچکی ہے۔

امریکی فوڈ اینڈ ڈرگ ایڈمنسٹریشن کے ابتدائی اعداد و شمار کے بعد ٹیلر فارمز نے کچے پیاز کی واپسی کا حکم جاری کیا ہے جو میکڈونالڈز کوارٹر پاؤنڈرز سے منسلک ایک مہلک بیکٹیریا ’’ای کولائی‘‘ (ایشریکیا کولائی) پھیلنے میں اہم کردار ادا کرتا ہے۔ اے بی سی نیوز کے ذریعہ حاصل کردہ میکڈونالڈز کے ڈسٹری بیوٹر یو ایس فوڈز سے واپسی کے نوٹس میں، اس کے فراہم کنندہ ٹیلر فارمز نے ’’ممکنہ ای کولائی آلودگی کی وجہ سے‘‘ خام پیاز کی واپسی کا اعلان کیا ہے۔ نوٹس میں لکھا گیا ہے کہ ’’ہمارے ریکارڈ سے پتہ چلتا ہے کہ متاثرہ پروڈکٹ کو آپ کے مقام پر بھیجا گیا ہے۔ یہ ضروری ہے کہ آپ جلد از جلد متاثرہ پروڈکٹ کا استعمال بند کر دیں۔‘‘ نوٹس میں چار مختلف مصنوعات شامل کی گئی تھیں: چھیلے ہوئے جمبو زرد پیاز کے ۳۰؍ پاؤنڈ تھیلے، ۳؍ بائی ۸؍ انچ کی کٹی ہوئی تازہ زرد پیاز کے ۴؍ سے ۵؍ پاؤنڈ تھیلے، تازہ زرد رنگ کے پیاز کے ۵؍ پاؤنڈ تھیلے، اور ۵؍ سے ۶؍ پاؤنڈ کے ثابت پیاز کے تھیلے۔ 

یہ بھی پڑھئے: ’’عصائے سنوار‘‘، عربی زبان کی ایک نئی اصطلاح، سوشل میڈیا پر وائرل

یو ایس فوڈز کے نوٹس میں کہا گیا ہے کہ ’’اگر آپ کو کوئی متاثرہ پروڈکٹ مل جائے تو براہ کرم معاملات کی تعداد ریکارڈ کریں اور پھر پروڈکٹ کو تباہ کر دیں۔‘‘ بلومبرگ کے مطابق، ٹیلر فارمز کو ابھی تک ای کولائی کا کوئی واضح ثبوت نہیں ملا ہے اور یہ واضح نہیں ہے کہ آیا یہ واپسی میکڈونالڈز میں پھیلنے والی تحقیقات سے منسلک ہے، لیکن ٹیلر فارمز فاسٹ فوڈ چین کیلئے پیاز فراہم کرنے والا ہے۔

ای کولائی کے سبب ۴۹؍ افراد شدید بیمار
خبر لکھے جانے تک بیماریوں کے کنٹرول اور روک تھام کے مراکز نے ای کولائی کے ۴۹؍ معاملات رپورٹ کئے ہیں جن میں ۱۰؍ اسپتال داخل ہیں۔ ۱۰؍ ریاستوں میں پھیلے اس بیکٹیریا سے ایک موت میکڈونالڈز کوارٹر پاؤنڈرز سے منسلک ہے۔ صحت کے عہدیداروں نے کہا ہے کہ انہیں توقع ہے کہ بیمار افراد کی تعداد میں اضافہ ہوگا۔ ایجنسی نے فوڈ سیفٹی الرٹ میں کہا کہ ’’یہ ایک تیزی سے پھیلنے والا بیکٹیریا ہے۔ بیشتر بیمار لوگ میکڈونالڈز کے کوارٹر پاؤنڈر ہیمبرگر کھانے کی اطلاع دے رہے ہیں اور تفتیش کار اس بات کی تصدیق کرنے کیلئے تیزی سے کام کر رہے ہیں کہ کھانے کا کون سا جزو اس بیکٹیریا سے آلودہ ہے۔‘‘ اس کے بعد ہی میکڈونالڈز نے اپنے مینو سے کوارٹر پاؤنڈر نکال دیا ہے جس کی امریکہ بھر میں ۲۰؍ فیصد فروخت ہوتی ہے۔ 

یہ بھی پڑھئے: انقرہ دہشت گردانہ حملہ: ۵؍ ہلاک، ۲۲؍ زخمی، عالمی لیڈران کی حملے کی مذمت، ملزمین کی شناخت ہوگئی

کمپنی کے ترجمان نے بدھ کو کہا کہ اگر پیاز کو ای کولائی کے پھیلنے کا ذریعہ پایا جاتا ہے، تو یہ پہلا موقع ہو گا جب پیاز میں یہ بیکٹیریا شامل ہوا ہوگا۔ ترجمان نے اس بات کا بھی اعادہ کیا کہ کوارٹر پاؤنڈرز میں استعمال ہونے والے پیاز، جیسا کہ سی ڈی سی ٹریسنگ ڈیٹا سے شناخت کیا گیا ہے، ان سپلائرز سے آیا ہے جو ای کولائی کیلئے بھی ٹیسٹ کرتے ہیں۔