جس وزیر نے لوک سبھا میں وقف ترمیمی بل پیش کیا، اسی سےعمر عبداللہ کی ملاقات مسلمانوں کے زخموں پر نمک پاشی کے مترادف ہے: محبوبہ مفتی۔

جموں کشمیر کے وزیر اعلیٰ عمر عبداللہ اور نیشنل کانفرنس کے صدر ڈاکٹر فاروق عبداللہ کی مرکزی وزیر کرن رجیجو کے ساتھ باغِ گل لالہ میں ملاقات کی تصاویر سوشل میڈیا پر وائرل ہونے کے بعد اپوزیشن  جماعتوں نے شدید غم و غصے کا اظہار کیا ہے۔
 پی ڈی پی صدر محبوبہ مفتی نے کہا کہ جس وزیر نے لوک سبھا میں وقف ترمیمی بل پیش کیا، اسی  سےعمر عبداللہ کی ملاقات مسلمانوں کے زخموں پر نمک پاشی کے مترادف ہے۔

یہ بھی پڑھئے: جس پارٹی کا ایک بھی مسلم ایم پی نہیں، اس میں اچانک اقلیتوں کیلئے اتنا درد کیوں؟

ان کا کہنا تھا کہ ایک طرف نیشنل کانفرنس کے ارکان نے اسمبلی میں وقف ترمیمی بل پر ڈراما رچا رہے ہیں اور دوسری طرف وزیر اعلیٰ عمر عبداللہ باغ گل لالہ میں کرن رجیجو کے ہمراہ چہل قدمی کر رہے ہیں۔انہوں نے کہا کہ ملک کے مسلمان جموں کشمیر اسمبلی کی طرف دیکھ رہے تھے لیکن نیشنل کانفرنس نے ایک بار پھر انہیں مایوس کیا۔ انہوں نے کہا کہ عمر عبداللہ کو بطورِ احتجاج مرکزی وزیر کرن رجیجو سے دور رہنا چاہئے تھا۔ ہندواڑہ کے رکنِ اسمبلی سجاد لون نے کہا،’’افسوس کی بات یہ ہے کہ مرکزی وزیر کرن رجیجو سے دوری اختیار کرنے کے بجائے عمر عبداللہ اپنے والد فاروق عبداللہ کے ہمراہ ان سے ملاقات کر رہے ہیں، جو کہ شرمناک ہے۔‘‘  قبل ازیں اقلیتی امور کے وزیر کرن رجیجو نے پیر کو شہرۂ آفاق جھیل ڈل کے کنارے واقع ایشیا کے سب سے بڑے باغِ گل لالہ کا دورہ کیا اور وہاں کے دلکش نظاروں سے محظوظ ہوئے۔
 اس موقع پر وزیر اعلیٰ عمر عبداللہ بھی ان کے ہمراہ تھےاور اس دوران نیشنل کانفرنس کے صدر ڈاکٹر فاروق عبداللہ  سے بھی ان کی ملاقات ہوئی۔  سوشل میڈیا پر عمر عبداللہ اور کرن رجیجو کی تصاویر وائرل ہونے کے بعد اپوزیشن  کے  دیگر لیڈروں نے بھی شدید ناراضگی ظاہر کی۔