ریٹائرمنٹ کے فیصلہ کے بعد اشون، آسٹریلیا کے خلاف اگلے ٹیسٹ میچ میں شرکت نہیں کریں گے البتہ کلب کرکٹ کھیلیں گے۔

ہندوستان کے کامیاب گیندبازوں میں شمار کئے جانے والے آر اشون نے بدھ کو آسٹریلیا کے خلاف ٹیسٹ سیریز کے دوران ریٹائرمنٹ کا اعلان کرکے دنیائے کرکٹ کو حیران کردیا۔ اس فیصلہ کے بعد وہ اگلے ٹیسٹ میچ میں شرکت نہیں کریں گے البتہ کلب کرکٹ کھیلیں گے۔
آسٹریلیا کے خلاف ڈرا ہوئے تیسرے ٹیسٹ کے اختتام پر کپتان روہت شرما کے ساتھ مشترکہ پریس کانفرنس میں اشون نے اپنے ریٹائرمنٹ کا اعلان کیا۔ انہوں نے کہا کہ میں آپ کا زیادہ وقت نہیں لوں گا۔ ہندوستانی کرکٹر کے طور پر آج کا دن میرے لئے آخری ہوگا۔ اس موقع پر انہوں نے کسی بھی سوال کا جواب دینے سے انکار کردیا اور اعلان کرنے کے بعد اسٹیج سے چلے گئے۔ روہت شرما نے اشون کے باہر چلے جانے کے بعد کہا کہ وہ اپنے فیصلے پر بہت یقین رکھتے ہیں۔ ہمیں ان کے ساتھ کھڑا ہونا چاہئے اور وہ بھی یہی چاہتے ہیں۔

یہ بھی پڑھئے: راہل، جڈیجا اور آکاش دیپ نے ٹیم انڈیا کو تباہی سے بچایا

۳۸ سالہ آف اسپنر اشون، ہندوستان کیلئے سب سے زیادہ وکٹ لینے والے دوسرے کھلاڑی ہے۔ انہوں نے ۱۰۶ میچوں میں ۵۳۷ وکٹ لئے ہیں۔ اول مقام پر انیل کمبلے (۶۱۹ وکٹ) ہیں۔ آسٹریلیا کے خلاف جاری ٹیسٹ سیریز میں اشون نے ایڈیلیڈ میں ہوئے ڈے اینڈ نائٹ ٹیسٹ میں شرکت کی اور ایک وکٹ حاصل کیا۔ اعلان سے چند گھنٹے قبل انہیں ڈریسنگ روم میں اسٹار بلے باز وراٹ کوہلی کے ساتھ ایک جذباتی لمحہ بانٹتے ہوئے دیکھا گیا۔

𝙏𝙝𝙖𝙣𝙠 𝙔𝙤𝙪 𝘼𝙨𝙝𝙬𝙞𝙣 🫡

A name synonymous with mastery, wizardry, brilliance, and innovation 👏👏

The ace spinner and #TeamIndia`s invaluable all-rounder announces his retirement from international cricket.

Congratulations on a legendary career, @ashwinravi99 ❤️ pic.twitter.com/swSwcP3QXA

— BCCI (@BCCI) December 18, 2024

بی سی سی آئی نے سوشل میڈیا پلیٹ فارم ایکس پر پوسٹ کرکے اشون کو خراج تحسین پیش کیا اور اور انہیں ایک ایسا شخص قرار دیا جس کا نام "مہارت، جادوگری، ذہانت اور اختراع کے مترادف" ہے۔