لیگ میں مسلسل ۳؍ شکست کے بعد چنئی ٹیم پر دباؤ۔ پنجاب کی ٹیم بھی فتح کیلئے پُر جوش۔

 مسلسل ۳؍ شکست کے بعددباؤ میں آئی چنئی سپر کنگز (سی ایس کے) منگل کو یہاں پنجاب کنگز (پی بی کے ایس) کے خلاف آئی پی ایل میچ میں جیت کی راہ پر واپس آنے کی پوری کوشش کرے گی۔
ممبئی انڈینس پر شاندار فتح کے ساتھ آئی پی ایل   ۲۰۲۵ءمہم کا آغاز کرنے والی سی ایس کے کو مسلسل ۳؍ شکست کا سامنا کرنا پڑا ہے۔ رائل چیلنجرز بنگلور، راجستھان رائلز اور دہلی کیپٹلس کے خلاف اس نے منہ کی کھائی ہے۔ شکست کی ہیٹ ٹرک نے ٹیم کی بیٹنگ اور بولنگ میں کمزوریوں کو بے نقاب کیا ہے۔  ۵؍بار کی چمپئن ٹیم نے اب تک کھیلے جانے والے  ۴؍ میچوں میں اپنے۱۷؍ کھلاڑیوں کا استعمال کیا ہے۔ یہ تبدیلی واضح طور پر حکمت عملی کی کمی کو ظاہر کرتی ہے۔
 پچھلے ۴؍ میچوں میں۱۲۱؍ رن بنانے والے کپتان رتوراج گائیکواڑ پر ملاں  پور کے مہاراجا یادوندر سنگھ انٹرنیشنل کرکٹ اسٹیڈیم میں بھی نظر ہوگی۔ ٹورنامنٹ میں ۱۰؍ وکٹ اپنے نام کرنے والے نور احمد بھی ٹیم کی سب سے بڑی امید ہیں۔ تاہم، رویندر جڈیجا اور شیوم دوبے جیسے سینئر کھلاڑیوں کا فارم اور کردار اور روی چندرن اشون کی قیادت میں ان کے اسپن شعبے کی مایوس کن کارکردگی پر سوالات کھڑے ہوئے ہیں۔

یہ بھی پڑھئے: دھونی نے آئی پی ایل سے ریٹائرمنٹ لینے سے انکارکیا

اس کے برعکس  راجستھان رائلز سے۵۰؍ رن  سے شکست کے باوجود پنجاب کنگز میں زیادہ یکجہتی دکھائی دی ہے۔   ایّر نے آگے بڑھ کر قیادت کی ہے اور ۳؍ میچوں میں۱۵۹؍ رن بنائے ہیں جبکہ نہال وڈھیرا نے مڈل آرڈر میں متاثر کیا ہے۔ پی بی کے ایس اپنے پچھلے ۵؍ میچوں میں سے ۴؍ میں کامیابی  حاصل کرنے کے ساتھ سی ایس کے پر اپنا حالیہ غلبہ برقرار رکھنے کیلئے خود کو تیار کرے گی تاہم  سی ایس کے مئی ۲۰۲۴ء میں پی بی کے ایس کے خلاف اپنے آخری میچ سے پرجوش ہوگی، جہاں انہوں نے۲۸؍ رن کی فتح تھی۔ رویندر جڈیجا بھی گیند اور بلے کے علاوہ فیلڈنگ کا کردار ادا کریں گے۔   ملاں پور کی پچ نے توازن کے اشارے  دیئے ہیں لیکن یہ  پچ ہدف کا تعاقب کرنے والی ٹیم کے لئے زیادہ سازگار ثابت ہوئی ہے۔پچھلے سیزن میں اس مقام پر ۵؍ میں سے ۳؍ میچ پہلے گیند بازی کرنے والی ٹیم نے جیتے تھے۔