ہسپانوی ٹینس کھلاڑی رافیل ندال نے آج اپنے سوشل میڈیا پر اعلان کیا کہ ڈیوس کپ ان کے ٹینس کریئر کا آخری مقابلہ ہوگا۔

ہسپانوی ٹینس کھلاڑی رافیل ندال نے اعلان کیا ہے کہ وہ اگلے ماہ ڈیوس کپ کے فائنل کے بعد ۳۸؍ سال کی عمر میں ٹینس سے ریٹائر ہو جائیں گے۔ ندال نے آج سوشل میڈیا پر ایک اعلان میں کہا کہ ’’واقعی، میں نے جو کچھ بھی تجربہ کیا ہے، وہ ایک خواب سا ہو گیا ہے۔ میں اپنی پوری اور ہر طرح سے کوشش کرنے کے بعد، مکمل ذہنی سکون کے ساتھ (ٹینس) چھوڑتا ہوں۔‘‘ خیال رہے کہ ندال نے ایک بے مثال دور کے دوران ۲۲؍ گرینڈ سلیم سنگلز ٹائٹل جیتے ہیں۔ ہسپانوی کھلاڑی نے اشارہ کیا کہ ان کا ریٹائرمنٹ کا فیصلہ مسلسل چوٹوں کے مسائل کے سبب کیا گیا ہے۔ 

Mil gracias a todos
Many thanks to all
Merci beaucoup à tous
Grazie mille à tutti
谢谢大家
شكرا لكم جميعا
תודה לכולכם
Obrigado a todos
Vielen Dank euch allen
Tack alla
Хвала свима
Gràcies a tots pic.twitter.com/7yPRs7QrOi

— Rafa Nadal (@RafaelNadal) October 10, 2024

انہوں نے کہا کہ ’’حقیقت یہ ہے کہ یہ کچھ سال مشکل رہے ہیں، خاص طور پر آخری دو سال۔ مجھے نہیں لگتا کہ میں بغیر کسی پابندی کے کھیلنے کے قابل ہوں۔ یہ واضح طور پر ایک مشکل فیصلہ ہے، جس کیلئے مجھے کچھ وقت لگا ہے۔ لیکن اس زندگی میں، ہر چیز کا ایک آغاز اور اختتام ہوتا ہے۔‘‘ ندال کو ’’کنگ آف کلے‘‘ کہا جاتا ہے۔ انہوں نے ۱۴؍ فرنچ اوپن چیمپئن شپ جیتے ہیں۔ 

یہ بھی پڑھئے: بنگلہ دیش: شکیب الحسن نے ملک میں پھیلی بدامنی کے دوران خاموشی پر معافی مانگی

ندال نے مزید کہا کہ وہ ڈیوس کپ میں اپنا کریئر ختم کرنے کیلئے پرجوش ہیں، جو اسپین کے شہر ملاگا میں کھیلا جائے گا۔ انہوں نے کہا کہ ’’میں بہت پرجوش ہوں کہ میرا آخری ٹورنامنٹ ڈیوس کپ کا فائنل ہو گا اور میں اپنے ملک کی نمائندگی کروں گا۔ ایک پیشہ ور ٹینس کھلاڑی کے طور پر اپنی پہلی بڑی خوشیوں میں سے ایک کے بعد مَیں پھر وہیں آگیا ہوں۔ ۲۰۰۴ء میں سیویل میں ڈیوس کپ کا فائنل کھیلا تھا، اور اب اسی کے ساتھ کریئر ختم کرنا چاہتا ہوں۔ میرے خیال میں سبکدوشی کا یہ مناسب وقت ہے۔‘‘