امریکہ نے ہندوستانی خفیہ ادارے را کے سابق افسر وکاس یادو پر امریکی سرزمین پر سکھ علاحدگی پسند لیڈر گر پتونت سنگھ پنوں کی سازش میں شامل ہونے کے الزام میں فرد جرم عائد کرنے کا اعلان کیا ہے۔ساتھ ہی انتباہ دیا ہے کہ امریکی اظہار رائے کی آزادی کو دبانے والے کو جوابدہ ٹہرایا جائےگا چاہے اس کا تعلق کہیں سے بھی ہو۔

امریکہ کے استغاثہ نے جمعہ کو ہندوستانی حکومت کے ملازم وکاش یادو عرف وکاس عرف امانت کے خلاف حوالہ اور کرایہ پر قتل کی سازش میں ملوث ہونے کے الزام میں فرد جرم عائد کرنےکا اعلان کیا ہے۔ وکاس پر ایک امریکی شہری گرپتونت سنگھ پنو کے قتل کی ناکام کوشش میں شامل ہونے کا الزام ہے۔بیان کے مطابق وکاس نے ہی سکھ علاحدگی پسند پنوں کو قتل کرنے کی سازش رچی تھی۔واضح رہے کہ پنو خالستانی تحریک کا رکن ہے اس کی تنظیم پر ہندوستان میں پابندی ہے اور پنو پر ہندوستان میں دہشت گردی میں شامل ہونے کا الزام ہے۔امریکہ کے محکمہ انصاف نے الزام لگایا ہے کہ ۳۹؍ سالہ  وکاس ہندوستان کی خفیہ ادارے ’’را‘‘ کا سابق افسر ہے۔امریکی اٹارنی کے مطابق ہندوستان میں رہ کر وکاس نے نکھل گپتا کو امریکی سر زمین پر امریکی شہری کے قتل کی سازش میں شامل کیا اور اسے ایک قاتل کو کرایہ پر حاصل کرنے کی ہدایت دی۔ اس معاملے کے دوسرے مشتبہ نکھل گپتا کو اس سال کے  اوائل میں امریکہ لایا گیا تھا کہ وہ مقدمے کا سامناکر سکے لیکن وکاس پہنچ سے دور رہا۔

یہ بھی پڑھئے: غزہ: معیشت تباہ،۸۰؍ فیصد سے زائد بیروزگار، جنگ کے اثرات کئی نسلوں پر محیط: یواین

اس بیان میں کہا گیا ہے کہ امریکہ میں اظہار رائے کی آزادی ہے، یہ ان تمام لوگوں کیلئے ایک انتباہ ہے جو کسی امریکی شہری کو نقصان پہنچانے اور خاموش کرنے کا ارادہ کر رہے ہیں، اس کیلئے انہیں جوابدہ ہونا ہوگا،اس سے کوئی سروکار نہیں وہ کون ہے اور کہاں سے تعلق رکھتا ہے۔اس بیان میں دعوی کیا گیا ہے کہ وکاس فرد جرم کے اوقات کے دوران ہندوستان کی سکریٹریٹ میں ملازم تھا جو ہندوستان کے خفیہ ادارے’’ را ‘‘ کا دفتر ہے۔ یادہ نے اپنا تعارف حفاظتی اہلکار ، فیلڈ افسر اور خفیہ محکمہ کے ملازم کے طور پر کرایا تھا۔جس نے ہندوستان میں رہ کرسازش رچی تھی۔ایف بی آئی نے یادو کو ’’ مطلوب‘‘ قرار دے کر ۱۰؍ اکتوبر کو اس کے خلاف گرفتاری وارنٹ جاری کیا ہے۔

یہ بھی پڑھئے:پاکستان مبینہ عصمت دری معاملہ: پنجاب میں تمام تعلیمی ادارے بند

یہ بیان ہندوستان اور کنیڈا کے مابین جاری سفارتی کشیدگی کے چند دن بعد آیا جس میں کنیڈا نے ہندوستان کے ایجنٹ پر اس کے ایک شہری اورخالستانی لیڈر نجر کے قتل کا الزام عائد کیا۔ ہندوستان نے ان الزامات کو خارج کر کے کنیڈا کے سفات کار کو ملک سے نکال دیا۔