کرناٹک ہائی کورٹ کی جانب سے اجازت ملنے کے بعد بدھ کو کلبرگی ضلع کےآلند قصبے میں واقع حضرت لادلے مشاک درگاہ کے احاطے میں واقع راگھو چیتنیہ شیولنگا کی مہاشیوراتری کی خصوصی پوجا سخت سیکیورٹی کے درمیان انجام دی گئی۔

کرناٹک ہائی کورٹ کی جانب سے اجازت ملنے کے بعد بدھ کو کلبرگی ضلع کےآلند قصبے میں واقع حضرت لاڈلے مشائخ درگاہ کے احاطے میں واقع راگھو چیتنیہ شیولنگا کی مہاشیوراتری کی خصوصی پوجا سخت سیکیورٹی کے درمیان انجام دی گئی۔کڈگنچی مٹھ کے سری ویربھدر شیو اچاریہ سوامی، شمالی کرناٹک خطے کے وشو ہندو پریشد کے نائب صدر لنگاراج اپا، بی جے پی کے سابق ضلعی (دیہی) صدر شیوراج پٹیل رڈیواڈگی، سابق ضلع پنچایت نائب صدر ہرشانند گٹیڈار، آر ٹی آئی ایکٹیوسٹ سیدرمیا ہیرے مٹھ اور دیگر افراد پر مشتمل۱۵؍ رکنی ٹیم نے درگاہ کے احاطے میں پوجا کی۔ اسی دوران، سری رام سینا کا بانی اور نفرت انگیز تقریرکیلئے بدنام  پرمود موتھالیک، جو بدھ کو شیولنگ پوجا میں شرکت کیلئےآلند قصبے پہنچا تھا، ضلعی حکام کی جانب سے پوجا کے مقام پرجانے سے روک دیاگیا۔ اس سے قبل منگل کو کرناٹک ہائی کورٹ کی جسٹس کے نٹراجن کی سربراہی میں بنچ نے ہندوؤں کولاڈلے مشائخ درگاہ کے احاطے میں واقع شیولنگ کی مہاشیوراتری کے موقع پر دوپہر۲؍ بجے سے شام۶؍ بجے تک پوجا کرنے کی اجازت دی تھی۔

یہ بھی پڑھئے: لو جہاد کی نفرت انگیز مہم کے خوف سے جھارکھنڈ کے جوڑے نے کیرالا میں پناہ لی

 
عدالت نے دائیں بازو کے رام سینا کے صدر اندولا سدلنگا کو پوجا میں شرکت کی اجازت دینے سے انکار کر دیا تھا۔ اس کے بعد سدلنگا نے اس فیصلے کو چیلنج کرتے ہوئے ہائی کورٹ میں اپیل دائر کی، جس کی سماعت ۳؍ مارچ کو ہونی ہے۔ عدالت نے زور دے کر کہا کہ دونوں طبقوں کو مقررہ وقت کا سختی سے پابند رہنا چاہیے اورمجوزہ مقام کے موجودہ حالات کو برقرار رکھنا چاہیے۔ حکام کو ہدایت کی گئی ہے کہ وہ رسومات کے دوران جگہ پر کسی بھی غیر مجاز تبدیلی کو روکیں۔  
کرناٹک پولیس نے پوجا کی عدالتی اجازت ملنے کے بعد لاڈلے مشائخ درگاہ کے ارد گرد سیکیورٹی سخت کر دی، جبکہ ضلعی انتظامیہ نے سی آر پی سی کی دفعہ ۱۴۴؍ نافذ کرتے ہوئے عوامی اجتماعات پر پابندی عائد کر دی۔ رپورٹس کے مطابق، قانون و نظم برقرار رکھنے اور کسی بھی ناخوشگوار واقعے کو روکنےکیلئے کل ۱۱۵۰؍ پولیس اہلکاروں کو تعینات کیا گیا ہے۔ اس کے علاوہ احتیاط کے طور پر کلبرگی کی ڈپٹی کمشنر فوزیہ ترنم نے منگل کی رات۱۱؍ بجے سے جمعرات صبح۶؍ بجے تک ضلع میں شراب کی فروخت پر پابندی عائد کردی۔ ساتھ ہی حفاظتی تدابیر کے تحت گاڑیوں کی آمد و رفت محدود کر دی گئی۔

یہ بھی پڑھئے: حکومت نے عدالتی مقدمات لڑنے کیلئے گزشتہ ۱۰ برسوں میں زائد از ۴۰۰ کروڑ روپے خرچ کئے

واضح رہے کہ عدالت نےسدرمیا ہیرے مٹھ کی جانب سے دائر کردہ رٹ پٹیشن پر سماعت کے دوران اجازت دی تھی، جس میں انہوں نے اپنی ٹیم کے ساتھ شیوراتری کے دن راگھو چیتنیہ شیولنگا پر پوجا کرنے کی اجازت مانگی تھی۔ ہائی کورٹ نے ۱۵؍ افراد کو درگاہ میں داخل ہو کر پوجا کرنے کی اجازت دی، حالانکہ درخواست گزار نے۵۰۰؍ عقیدت مندوں کو اجازت دینے کی درخواست کی تھی۔ دراصل یہ درگاہ ۱۴؍ ویں صدی کے صوفی لاڈلے مشائخ سے منسوب ہے ، ساتھ ہی یہاں ۱۵؍ ویں صدی کے ہندو سنت راگھو چیتنیہ کی سمادھی بھی واقع ہے۔۲۰۲۲ء میں کچھ افراد کے ذریعے شیو لنگا کی بے حرمتی کےبعد فرقہ وارانہ جھڑپیں بھی ہوئی تھیں، جس کے بعد ۱۰؍ خواتین سمیت ۱۶۷؍ افراد کو گرفتار کیا گیا تھا۔