اس خبر کے سامنے آنے کے بعد مقامی مسلم برادری کو گہرا صدمہ اور پریشانی ہوئی ہے۔ علاقہ میں پولیس کے ذریعہ اضافی گشت کیا جارہا ہے اور پولیس نے گواہوں یا اس سلسلے میں معلومات رکھنے والوں سے رابطہ کرنے کی اپیل کی ہے۔

برطانوی پولیس نے منگل کو واٹفورڈ کے کارپینڈرز پارک لان قبرستان کے مسلم حصہ میں ۸۵ قبروں کی بے حرمتی کے واقعہ کی تحقیقات شروع کردی ہے۔ ذرائع کے مطابق، جن قبروں کی بے حرمتی کی گئی، ان میں سے کئی بچوں اور چھوٹے بچوں کی ہیں۔ اس مجرمانہ حرکت کو اسلامو فوبک نفرت انگیز جرم سمجھا جا رہا ہے جس سے مقامی مسلم برادری کے جذبات کو ٹھیس پہنچی ہے۔ 

یہ بھی پڑھئے: غزہ میں جاں بحق ہونے والوں کی تعداد ۵۱؍ ہزار سے تجاوز کرگئی

میڈیا رپورٹس کے مطابق، ہرٹفورڈشائر کاؤنٹی کی پولیس نے بتایا کہ قبرستان کا دورہ کرنے والے ایک غمزدہ خاندان نے ہمیں اس مجرمانہ فعل اور نقصان کی اطلاع دی۔ اس خبر کے سامنے آنے کے بعد مقامی مسلم برادری کو گہرا صدمہ اور پریشانی ہوئی ہے۔ علاقہ میں پولیس کے ذریعہ اضافی گشت کیا جارہا ہے اور پولیس نے گواہوں یا اس سلسلے میں معلومات رکھنے والوں سے رابطہ کرنے کی اپیل کی ہے۔ انسپکٹر ول راجرز-اووری نے تصدیق کی کہ سینئر افسران متاثرہ خاندانوں کی حمایت کیلئے برادری کے لیڈران کے ساتھ کام کر رہے ہیں۔ انہوں نے کہا، "آنے والے دنوں میں ہم مسلم برادری کے ساتھ مزید رابطہ کریں گے جو اس خوفناک جرم سے خاص طور پر متاثر ہوئی ہے۔"

تھری ریورز ڈسٹرکٹ کونسل کے کنزرویٹو کونسلر عباس میرالی نے مسلم قبرستان میں توڑ پھوڑ کو “وحشیانہ عمل” قرار دیا اور کہا کہ اس سے “غمزدہ خاندانوں کو شدید تکلیف اور مسلم برادری کو گہری چوٹ پہنچی ہے۔” وادی فیونرل کیئر، جو خطے میں کئی مسلم خاندانوں کی خدمت کرتی ہے، نے قبروں کی بے حرمتی کو “دل شکن” قرار دیا اور کہا کہ کچھ قبروں کی “ناقابل بیان طریقوں سے بے حرمتی” کی گئی ہے۔

یہ بھی پڑھئے: یورپی یونین نے مغربی کنارہ اور غزہ کیلئے ۶ء۱؍ ارب یورو کی امداد فراہم کی

کارپینڈرز پارک لان قبرستان، واٹفورڈ میں واقع ہے جو برطانوی دارالحکومت لندن کے شمال مغرب میں تقریباً ۲۴ کلومیٹر کی دوری پر واقع ایک قصبہ ہے اور نان میٹرو پولیٹن ضلع کی حیثیت رکھتا ہے۔ یہ برینٹ کونسل کی ملکیت اور اسی کے زیر انتظام ہے۔ کونسل کے رہنما محمد بٹ نے اس واقعہ کی مذمت کرتے ہوئے اسے اسلامو فوبک اور ممکنہ طور پر نفرت انگیز عمل قرار دیا۔ انہوں نے کہا، "ایسا لگتا ہے کہ مسلم قبروں کو ایک اسلامو فوبک نفرت انگیز جرم کے طور پر نشانہ بنایا گیا ہے۔ ہماری ہمدردی ان خاندانوں کے ساتھ ہیں جن کے پیاروں کی قبروں کی بے حرمتی کی گئی۔ ہم ان نام کی تختیوں کو بحال کریں گے جنہیں نقصان پہنچا ہے اور پولیس کی تحقیقات مکمل ہونے کے بعد قبرستان کو ایک پرامن اور یادگار جگہ کے طور پر بحال کریں گے۔"