امریکہ میں کولمبیا یونیورسٹی کے طالب علم اور فلسطین حامی محمود خلیل کی گرفتاری پر مظاہرین نے نیویارک سٹی میں ٹرمپ ٹاور کی لابی پر قبضہ کرلیا۔ اسی دوران پولیس نےتقریباً۱۰۰؍مظاہرین گرفتار کرلیا ہے۔

امریکہ میں کولمبیا یونیورسٹی کے طالب علم اور فلسطین کے زبردست حامی محمود خلیل کی گرفتاری پر مظاہرین نے نیویارک سٹی میں ٹرمپ ٹاور کی لابی پر قبضہ کرلیا۔ خبرایجنسی رائٹرز کی رپورٹ کے مطابق جیویش وائس فار پیس نے ٹرمپ ٹاور میں احتجاج کیا اور گروپ کا کہنا تھا کہ وہ عوام مخالف اقدامات پر احتجاج کرنے کیلئے ٹرمپ ٹاور پر قبضہ کر رہے ہیں۔ گروپ نے سوشل میڈیا پر بیان میں کہا کہ ہم فلسطینیوں پر ظلم کرنے کی فاشسٹ حکومت کی کوششوں کے ساتھ نہیں ہیں اور امریکی فنڈ سے فلسطینیوں کی نسل کشی کے اقدامات بند کرنے کا مطالبہ کرتے ہیں۔ 

یہ بھی پڑھئے: جاپان اور جنوبی کوریا کے بعد امریکہ میں بھی شرح پیدائش میں کمی

نیویارک کے محکمہ پولیس نے بتایا کہ ٹرمپ ٹاور میں تقریباً۱۵۰؍ مظاہرین جمع ہوگئے جنہوں نے مختلف کارڈ اٹھا رکھے تھےجن میں لکھا ہوا تھا کہ نازیوں سے لڑیں طلبہ سے نہیں اور محمود کو رہا کرو۔ اسی دوران پولیس نے چند مظاہرین کو گرفتار بھی کرلیا اور پولیس نے بتایا کہ اس نے۹۸؍ افراد کو گرفتار کرلیا ہے۔ بتا دیں کہ مین ہیٹن ففتھ ایونیو میں واقع ٹرمپ ٹاور بنیادی طور پر ٹرمپ آرگنائزیشن کا مرکز ہے جہاں امریکی صدر ڈونالڈ ٹرمپ اور خاتون اول میلانیا ٹرمپ کا ایک پینٹ ہاؤس اپارٹمنٹ ہے، ان کا بیٹا بیرن بھی نیویارک یونیورسٹی میں داخلے کے بعد وہیں رہائش پذیر ہے۔ 

یہ بھی پڑھئے: فلسطینی غیر ملکی تسلط کبھی قبول نہیں کریں گے: حماس

میئر پبلک سیفٹی کاز ڈوفٹری نے کہا کہ تمام مظاہرین کو وہاں سے ہٹا دیا گیا ہے اور کسی کو کوئی زخم نہیں آئے۔ واضح رہے کہ امریکی حکومت نے کولمبیا یونیورسٹی کے طالب علم اور غزہ جنگ میں اسرائیل کے مظالم کے خلاف احتجاج کرنے والے محمود خلیل کو۸؍ مارچ کو گرفتار کرلیا تھا۔ محمود خلیل کی گرفتاری کے بعد مختلف حلقوں کی جانب سے شدید تنقید کی گئی تھی اور ان کی رہائی کیلئے عدالت کے سامنے بھی احتجاج کیا گیا تھا۔ قبل ازیں امریکی عدالت نے ٹرمپ انتظامیہ کو محمود خلیل کو ڈی پورٹ کرنے سے روک دیا تھا کیونکہ ٹرمپ انتظامیہ انہیں فوری طور پر ڈی پورٹ کر رہی تھی حالانکہ محمود خلیل امریکہ کے شہری اور کولمبیا یونیورسٹی کے طالب علم ہیں۔