اس بل کی رو سے کسی غیر ملکی شخص امریکی شہریوں یا اسرائیل سمیت کسی اتحادی ملک کے شہریوں کے بارے میں تفتیش، گرفتاری، حراست یا مقدمہ چلانے پر پابندی عائد کردی گئی ہے۔

امریکی ایوان نمائندگان نے غزہ میں اسرائیل کے ذریعہ ہزاروں فلسطینی شہریوں کے قتل عام پر اسرائیلی وزیراعظم بنجامن نیتن یاہو اور سابق وزیر دفاع یوو گیلنٹ کے خلاف بین الاقوامی فوجداری عدالت (آئی سی سی) کے ذریعہ جاری کئے گئے گرفتاری وارنٹ کے خلاف احتجاج کرتے ہوئے ایک بل منظور کیا ہے۔ جمعرات کو ہوئی ووٹنگ میں "غیر قانونی عدالتی انسداد ایکٹ" کے حق میں ۲۴۳ نمائندگان نے ووٹ دیا جبکہ ۱۴۰ نے اس کی مخالفت کی۔ بل کی حمایت کرنے والوں میں ۱۹۸ ریپبلکن اراکین اور ۴۵ ڈیموکریٹ اراکین شامل تھے۔ کسی ریپبلکن نے اس کے خلاف ووٹ نہیں دیا۔ اس بل کی رو سے کسی غیر ملکی شخص امریکی شہریوں یا اسرائیل سمیت کسی اتحادی ملک کے شہریوں کے بارے میں تفتیش، گرفتاری، حراست یا مقدمہ چلانے پر پابندی عائد کردی گئی ہے۔ 

یہ بھی پڑھئے: ’گریٹر اسرائیل‘ کے نقشے پرعرب ممالک برہم، کہا: خودمختاری پر صریح حملہ

ایوان کی خارجہ امور کی کمیٹی کے ریپبلکن چیئرمین کے نمائندے برائن مست نے ووٹنگ سے قبل ایوان سے خطاب کرتے ہوئے کہا، "امریکہ یہ قانون پاس کر رہا ہے کیونکہ ایک غیر قانونی عدالت ہمارے عظیم اتحادی اسرائیل کے وزیر اعظم کو گرفتار کرنے کی کوشش کر رہی ہے۔" سینیٹ کے نئے ریپبلکن اکثریتی رہنما، جان تھون نے اپنے چیمبر میں اس ایکٹ پر تیزی سے غور کرنے کا وعدہ کیا تاکہ ٹرمپ اقتدار سنبھالنے کے فوراً بعد اس پر قانون میں دستخط کر سکیں۔

اسرائیل کے جنگی جرائم

آئی سی سی ایک مستقل عدالت ہے جو افراد پر جنگی جرائم، انسانیت مخالف جرائم، نسل کشی اور رکن ممالک میں یا ان کے شہریوں کی طرف سے جارحیت کے جرائم کا مقدمہ چلا سکتی ہے۔ عدالت نے کہا کہ اسرائیلی حکام کے خلاف وارنٹ جاری کرنے کا اس کا فیصلہ تمام معاملات میں اس کے نقطہ نظر، پراسیکیوٹر کے آگے بڑھنے کیلئے کافی شواہد کی موجودگی کے جائزہ اور فوری طور پر گرفتاری وارنٹ جاری کرکے جرائم کو روکنے کے خیال کے مطابق تھا۔ 

یہ بھی پڑھئے: ٹرمپ خفا، نیتن یاہو پر بَرسے ، کیا واقعی؟

آئی سی سی کے نیتن یاہو اور ان کے سابق دفاعی سربراہ یوو گیلنٹ کے گرفتاری وارنٹ جاری کرنے اور ان پر ۱۵ ماہ سے جاری غزہ کے شہریوں کی نسل کشی میں جنگی جرائم اور انسانیت مخالف جرائم میں ملوث ہونے کا الزام عائد کرنے کے بعد امریکی کانگریس کے ریپبلکن اراکین آئی سی سی کی مذمت کر رہے ہیں۔ ریپبلکن پارٹی کے زیرقیادت ایوان نے جون میں آئی سی سی پر پابندیاں عائد کرنے کیلئے ایکٹ منظور کیا تھا لیکن ایوان نمائندگان میں یہ قدم نہیں اٹھایا گیا تھا، جس پر اس وقت ڈیموکریٹک اکثریت کا کنٹرول تھا۔ واضح رہے کہ آئی سی سی نے نومبر ۲۰۲۴ء میں اسرائیلی وزیراعظم اور سابق وزیر دفاع کی گرفتاری کے وارنٹ جاری کیے تھے۔ اسرائیل، فلسطینی علاقہ غزہ پٹی میں جاری جنگ کیلئے جنگ عالمی عدالت انصاف میں نسل کشی کے مقدمے کا بھی سامنا کررہا ہے۔