عرصہ دراز سے مسلم مخالفت کی جومہم چلائی جا رہی تھی اب اس کے نتائج آنا شروع ہو گئے ہیں، پہلے جو نفرت دل ہی دل میں رہ جاتی تھی اور اب اس میں اتنا اضافہ ہو چکا ہے کہ چھلک کر باہر آنے لگی ہے، اس نفرت کا اندازہ اس بات سے لگایا جا سکتا ہے کہ اتر پردیش کے بریلی ضلع کے پنجاب پورہ علاقے میں ایک مسلم خاتون کے مکان خریدنے پر وہاں کےہندوئوں نے احتجاج کرتے ہوئے مجموعی نقل مکانی کی دھمکی دی ہے۔

پیر ۱۹؍ اگست کو لوگ ہاتھوں میں پلے کارڈ لئے نعرے لگا رہے تھے،دراصل وہ علاقے کے سابق مکین وشال سکسینہ کے ذریعے اپنا مکان ایک مسلم خاتون شبنم کے ہاتھوں فروخت کرنے کی مخالفت کر رہے تھے۔ایک ویڈیو میں لوگوں کو ’’وشال سکسینہ مردہ باد‘‘ کے نعرے لگاتے ہوئے دیکھا جا سکتا ہے۔ان کا کہنا تھا کہ وہ علاقے میں گوشت کا استعمال، مسلمانوں کے تہوار، اوربد نیتی پر مبنی لو جہاد کو ہرگز برداشت نہیں کریں گے۔اسی کے ساتھ مکینوں نے دھمکی دی کہ اگر ان کا مطالبہ تسلیم نہیں کیا گیا تو وہ اجتماعی نقل مکانی کریں گے،اور یہ نعرہ لکھ کر انہوں نے دیگر مکانوں کے دروازوں پر لگا دیا۔   

یہ بھی پڑھئے: غزہ میں اسرائیلی حملوں میں ۵۰؍ سے زائد فلسطینی شہید، متعدد زخمی

شبنم کے بھائی نسیم بشیری نے میڈیا سے کہا کہ اس علاقے میں کئی سالوں سے ہندو مسلم اتحاد قائم ہے۔اگر مقامی لوگوں کو کوئی شکایت تھی تو انہیں ہم سے رابطہ کرنا چاہئے تھا، اس طرح ہنگامہ کرنے کی کوئی ضرورت نہیں تھی۔ ہم نے مکان مالک سے کہا ہے کہ ہم کسی طرح کا تنازع پیدا نہیں کرنا چاہتے، اگر ہمارے یہاں رہائش اختیار کرنے سے دیگر لوگوں کو دقت ہے تو ہم یہاں نہیں رہیں گے۔ ہم نے مکان کی چابی لوٹا دی ہے۔

یہ بھی پڑھئے: بوسنیا: اسکول انتظامیہ سے تنازع کے بعد ملازم کی فائرنگ، تین افراد ہلاک

ایک ہندو مکین اروند شریواستو جو بریلی باراسو سی ایشن کے سابق صدر ہیں کہا کہ ’’ انہیں دیگر رہائشیوں سے اجازت لینی چاہیے تھی، چونکہ یہاں تمام  مکین تعلیم یافتہ ہیں، لہٰذا معیار زندگی میں کافی تضاد ہے، یہاں امن قائم نہیں رہےگا، یہاں کس قسم کےلوگ آئیں گے اگر ایک گل فروش نے یہاں مکان لے لیا تو؟لو جہاد کے معاملے بڑھ جائیں گے، تو اس کا ذمہ دار کون ہوگا ۔نسیم کے بقول کچھ لوگوں نے شدت پسند تنظیموں سے رابطہ کیا تاکہ علاقے میں بد امنی پیدا ہو،ہم یہاں ہندوئوں کے ساتھ رہتے ہیں ، ہمیں اپنے اطراف آباد ہندوئو ں سے کوئی دقت نہیں ہے۔ایک دیگر خاتون نے کہا کہ اگر مکان فروخت کرنے والے اور خریدار نے دیگر مکینوں سے اجازت نامہ حاصل نہیں کیا ہے تو انہوں نے غلطی کی ہے۔اور ایک مکین نے مسلمانوں کی مخالفت کی وجہ بتاتے ہوئے کہا کہ ہم یہاں اپنے بچپن سے رہائش پذیر ہیں، اگر مسلمان یہاں آکر آباد ہونا شروع ہو گئے تو ہمارے بچوں کا مستقبل متاثر ہوگا،اس کے علاوہ مسلمان دوسروں کے تہوار میں خلل بھی ڈالتے ہیں۔

Hindu residents protest in Uttar Pradesh’s Bareilly district after a Muslim woman buys a house in the area and threatens `mass exodus` pic.twitter.com/gLRW8HEqea

— Mobassir مبشر 🇮🇳🇵🇸 (@03_mobassir) August 22, 2024

بریلی پولیس نے اس واقع کی تصدیق کرتے ہوئے بتایا کہ انہوں نے تمام فریقوں کے ساتھ بات چیت کی ہے اور انہیں آپسی رضامندی سے مسئلے کو حل کرنے کا مشورہ دیا ہے۔ واضح رہے کہ اس سے قبل ایک اور رہائشی سلمان میاں نے بھی اس علاقے میں مکان خریدا تھا، اس وقت بھی یہاں کے مکینوں نے اسی طرح کے رد عمل کا اظہار کیا تھا۔