نام تبدیل کرنے کے اعلان کے دوران وزیراعلیٰ نے کہا، "عوام ہندوستانی ثقافت میں نمایاں کردار ادا کرنے والے عظیم شخصیات سے تحریک حاصل کر سکیں، اس لئے ان مقامات کے نام کو تبدیل کیا جا رہا ہے۔"

اتراکھنڈ کے وزیر اعلیٰ پُشکر سنگھ دھامی نے پیر کو اعلان کیا کہ عوامی جذبات اور ہندوستانی ثقافت و ورثے کو دھیان میں رکھتے ہوئے حکومت نے ریاست کے ۴ اضلاع کے ۱۷ مقامات کے نام تبدیل کرنے کا فیصلہ کیا ہے۔ اتراکھنڈ حکومت کا یہ اقدام اس وقت سامنے آیا جب مہاراشٹر میں ہندوتوا تنظیموں کے مطالبہ پر اورنگ آباد میں واقع مغل بادشاہ اورنگ زیب کے مقبرے کو ہٹانے کے معاملے پر فرقہ وارانہ تناؤ پایا جا رہا ہے۔

हरिद्वार जनपद का औरंगज़ेबपुर अब शिवाजी नगर के नाम से जाना जाएगा...

जनभावनाओं के अनुरूप हरिद्वार, देहरादून, नैनीताल और उद्धम सिंह नगर जनपदों में स्थित विभिन्न स्थानों के नाम परिवर्तित किए गए हैं। pic.twitter.com/4Vp5pEocmI

— Pushkar Singh Dhami (@pushkardhami) March 31, 2025

دھامی نے بتایا کہ ہری دوار ضلع کے اورنگ زیب پور کا نام شیواجی نگر، غازیوالی کا نام آریہ نگر، خان پور کا نام شری کرشنا پور اور خان پور کورسالی کا نام تبدیل کرکے امبیڈکر نگر رکھا گیا ہے۔ اسی ضلع میں چاندپور اب جیوتی با پھولے نگر، محمد پور جٹ اب موہن پور جٹ، ادریس پور اب نند پور، اکبر پور/فضل پور اب وجے نگر، آصف نگر اب دیو نارائن نگر اور سلیم پور راجپوتان اب شور سین نگر کہلائے گا۔ ادھم سنگھ نگر ضلع کے سلطان پور پٹی کا نام کوشلیہ پوری رکھا گیا ہے۔

یہ بھی پڑھئے: جنتا دل یونائیٹڈ نے مرکزی حکومت کو وقف ترمیمی بل سے متعلق ۳؍مشورے پیش کئے

بی جے پی لیڈر نے مزید بتایا کہ دہرادون ضلع میں میان والا کا نام رام جی والا، پیروالا کا نام کیسری نگر، چاندپور خُرد کا نام پرتھوی راج نگر اور عبد اللہ پور کا نام تبدیل کرکے دکش نگر رکھا گیا ہے۔ جبکہ نینی تال ضلع میں نوابی روڈ اور پنچکی-آئی ٹی آئی روڈ کا نام تبدیل کرکے اٹل مارگ اور گرو گولوالکر مارگ رکھا گیا ہے۔ واضح رہے کہ مادھو سداشیو راو گولوالکر آر ایس ایس کے ۱۹۴۰ء سے ۱۹۷۰ء کی دہائی تک سربراہ رہے تھے۔ نام تبدیل کرنے کے اعلان کے دوران دھامی نے کہا، "عوام ہندوستانی ثقافت میں نمایاں کردار ادا کرنے والے عظیم شخصیات سے تحریک حاصل کر سکیں، اس لئے ان مقامات کے نام کو تبدیل کیا جا رہا ہے۔"

یہ بھی پڑھئے: راجستھان: عیدا الفطر کے جشن میں ہندو گروپ کی شرکت، مسلمانوں پر پھول برسائے

یاد رہے کہ ماضی میں کئی بی جے پی حکومتوں نے مقامات کے "اسلامی ناموں" کو ہندوتوا نظریات اور ہندی الفاظ سے تبدیل کیا ہے۔ رواں سال جنوری میں مدھیہ پردیش کی بی جے پی حکومت نے "عوامی جذبات کے پیش نظر" ۱۱ گاؤں کے نام تبدیل کئے تھے۔ فروری میں دہلی اسمبلی انتخابات میں فتح حاصل کرنے کے فوراً بعد، بی جے پی ایم ایل اے نے نجات گڑھ حلقے کا نام نہار گڑھ، مصطفیٰ آباد کا نام شیو وہار اور دارالحکومت کے گاؤں محمد پور کا نام مادھو پورم رکھنے کی تجویز پیش کی تھی۔