سیالدہ کورٹ کا فیصلہ، پیر کو سزا کا اعلان ، سنجے رائے کی بڑی بہن نے کہا کہ ٹرائل کورٹ کے فیصلے کو کسی بھی عدالت میں چیلنج کرنے کا ارادہ نہیں، سنجے نے کہا کہ اسے پھنسایا گیا۔

کولکاتا کے آرجی کرمیڈیکل کالج میں ٹرینی ڈاکٹر کی آبروریزی اور قتل معاملے میں سنیچر کو سیالدہ کورٹ نے کلیدی ملزم سنجے رائے کومجرم قرار دیا۔ سزا کا اعلان پیر کو کیا جائے گا۔ عدالت نے ۱۶۲؍ دن بعد فیصلہ سنایا۔ سی بی آئی نے ملزم سنجے رائےکو سزائے موت دینے کی اپیل کی ہے۔ اس ساتھ ہی سنجے کی بڑی بہن نے کہا کہ ٹرائل کورٹ کے اس فیصلے کو کسی بھی عدالت میں چیلنج کرنے کا کوئی منصوبہ نہیں ہے۔ 
 واضح رہےکہ آر جی کر اسپتال میں ۸؍ اور۹؍ اگست کی درمیانی شب ایک لرزہ خیز واردات میں ٹرینی ڈاکٹر کی عصمت دری کی گئی تھی اوراسے قتل کر دیا گیا۔ ۹؍ اگست کی صبح ڈاکٹر کی لاش سیمینار ہال میں ملی تھی۔ سی سی ٹی وی فوٹیج کی بنیاد پر پولیس نے ۱۰؍ اگست کو سنجے رائے نامی ایک رضاکار کو گرفتار کیا تھا۔ اس واقعے کے بعد کولکاتا سمیت ملک بھر میں احتجاجی مظاہرے ہوئے۔ بنگال میں صحت کی خدمات۲؍ ماہ سے زائد عرصے سے مفلوج تھیں۔ 
فیصلے سے متعلق۳؍ بڑی باتیں 
۱) فورینسک رپورٹ فیصلے کی بنیاد:عدالت نے سزا کو فورنسک رپورٹ کی بنیاد پر سنایا جس سے پتہ چلتا ہے کہ سنجے رائے اس کیس میں ملوث تھا۔ جائے وقوع سے اور متاثرہ ڈاکٹر کے جسم کے نمونوں پر بھی سنجے رائے کا ڈی این اے پایا گیا تھا۔ رائے کو انڈین جسٹس کوڈ ایکٹ کی دفعہ ۶۴، ۶۶؍اور۱۰۳(۱)کے تحت قصوروار پایا گیا تھا۔ 
۲) زیادہ سے زیادہ سزا موت ہوگی:جسٹس انیربن داس نے کہا کہ اس معاملے میں زیادہ سے زیادہ سزا ئےموت ہو سکتی ہے۔ کم سے کم سزا عمر قید ہوگی۔ 
۳)مجرم سنجے کو بولنے کا موقع ملے گا:جب ملزم سنجے نے کہا کہ اسے اس کیس میں پھنسایا جا رہا ہےتو جسٹس انیربن داس نے کہا کہ سزا سنانے سے پہلے انہیں بولنے کا موقع دیا جائے گا۔ 

یہ بھی پڑھئے: ’’جنگ بندی معاہدہ ہورہا ہے تو بم کیوں برسا رہے ہو؟‘‘بلنکن سے سوال پر صحافی کو گھسیٹ کر باہر نکال دیا 

بنگال پولیس سے تفتیش سی بی آئی کو سونپ دی گئی تھی
 ۹؍اگست کے واقعے کے بعد آر جی کر اسپتال کے ڈاکٹروں اور متاثرہ کے اہل خانہ نے معاملے کی سی بی آئی تحقیقات کا مطالبہ کیا تھا لیکن وزیر اعلیٰ ممتا بنرجی نے جانچ کا حکم نہیں دیا تھا۔ ہائی کورٹ کے حکم کے بعد۱۳؍ اگست کو جانچ سی بی آئی کو سونپ دی گئی۔ اس کے بعد سی بی آئی نے نئے سرے سے جانچ شروع کی۔ ملزم سنجے رائے کے علاوہ میڈیکل کالج کے سابق پرنسپل سندیپ گھوش کو بھی اس کیس میں ملزم بنایا گیا تھا، لیکن سی بی آئی ۹۰؍ دنوں کے اندر گھوش کے خلاف چارج شیٹ داخل نہیں کر سکی جس کی وجہ سے سیالدہ کورٹ نے گھوش کو اس کیس میں ضمانت دے دی تھی۔ اس کے علاوہ تالا پولیس اسٹیشن کے سابق انچارج ابھیجیت منڈل کو بھی چارج شیٹ داخل نہ کرنے پر ضمانت مل گئی۔ 
 اس سے قبل۲۵؍ اگست کو سی بی آئی نے سینٹرل فورنسک ٹیم کی مدد سے کولکاتا کی پریسیڈنسی جیل میں سنجے کا پالی گراف ٹیسٹ کرایا تھا۔ حکام نے اس سے تقریباً۳؍ گھنٹے تک پوچھ گچھ کی تھی۔ سنجے سمیت۱۰؍ لوگوں کا پالی گراف ٹیسٹ کیا گیا۔ ان میں آر جی کر کے سابق پرنسپل سندیپ گھوش، اے ایس آئی انوپ دتہ، چار ساتھی ڈاکٹر، ایک رضاکار اور ۲؍گارڈ شامل تھے۔ 

یہ بھی پڑھئے: غزہ: قیدیوں کے پاس سوائے ان کے کپڑوں کے کچھ نہیں ہوتا: فلسطینی وکیل کا انکشاف

سنجے کو ائرفون اور ڈی این اے کے ذریعے پکڑا گیا
 ٹاسک فورس نے تحقیقات شروع کرنے کے۶؍گھنٹے کے اندر سنجے رائے کو گرفتار کر لیا تھا۔ سی سی ٹی وی کے علاوہ پولیس کو سیمینار ہال سے ایک ٹوٹا ہوا بلوٹوتھ ایئر فون بھی ملا تھا۔ یہ مجرم کے فون سے منسلک تھا۔ مقتول کا خون سنجے کی جینس اور جوتوں پر پایا گیا تھا۔ سنجے کے جسم پر چوٹوں کے پانچ نشانات۲۴؍ سے۴۸؍گھنٹوں کے دوران پائے گئے تھے۔ اس سے نتیجہ اخذ کیاگیا تھاکہ اسے یہ چوٹ تب لگی جب متاثرمزاحمت ا وردفاع کرنے کی کوشش کررہی تھی۔ 
فیصلے کے بعدسنجے رائے شور مچانے لگا 
  سیالدہ کی عدالت نےسنیچر کو جب آر جی کرمعاملے میں ڈیزاسٹر مینجمنٹ میں پولیس کے تحت کام کرنے والے رضاکار سنجے رائے کو جب مجرم قراردیا تو وہ چیخ پڑا اور شورمچانے لگا۔ یہ فیصلہ ۱۲؍ منٹ کی سماعت کے بعد ہی سنا دیاگیا۔ سنجے رائے نے جج کو بتایا کہ وہ بے قصور ہے، اسے پھنسایا جا رہا ہے۔ سنجے نے کمرہ عدالت کے اندر اپنے گلے میں رودرکش کے ہار کا بھی ذکر کیا۔ جج نے کہا کہ وہ پیر کو ساڑھے۱۲؍ بجے اس کی سماعت کریں گے اور اسی دن سزا کا اعلان کیا جائے گا۔ فیصلے سے قبل متاثرہ کے والدین نےسی بی آئی جانچ پر عدم اطمینان ظاہر کیاتھا۔