دی کامن کاز اور لوک نیتی-سی ایس ڈی ایس کی رپورٹ نے انکشاف کیا کہ کس طرح ہندوستان میں مسلمانوں کو غیر منصفانہ طور پر تشدد کا نشانہ بنایا جاتا ہے اور حراست میں قتل کردیا جاتا ہے، لیکن پولیس کو جوابدہ نہیں ٹھہرایا جاتا۔

دنیا کی سب سے بڑی جمہوریت کہلائے جانے والے ہندوستان میں مسلم اقلیت کو پولیس کے مظالم کا سامنا کرنا پڑتا ہے۔ ایک تازہ، پریشان کن رپورٹ نے مسلمانوں کو درپیش پولیس کی وحشیانہ بربریت کو اجاگر کیا ہے جس سے قانون نافذ کرنے والے اداروں میں مسلمانوں کے تئیں گہرے تعصبات کا انکشاف ہوتا ہے جو غیر منصفانہ تشدد، حراستی اموات اور وسیع پیمانے پر امتیازی سلوک کا باعث بنتے ہیں۔ دی کامن کاز اور لوک نیتی-سی ایس ڈی ایس کی "ہندوستان میں پولیسنگ کی صورتحال رپورٹ ۲۰۲۵ء" (ایس پی آئی آر ۲۰۲۵ء) ایک پریشان کن حقیقت کو سامنے لاتی ہے کہ ملک میں پولیس کا تشدد ایک منظم شکل اختیار کر چکا ہے جس کا سب سے بڑا نشانہ مسلمان اور دیگر پسماندہ برادریاں ہیں۔

ایس پی آئی آر ۲۰۲۵ء رپورٹ کے نتائج چونکا دینے والے ہیں۔ رپورٹ ایسی کئی باتوں کی تصدیق کرتی ہے جن کے تعلق سے کارکنان طویل عرصہ سے مشکوک تھے۔ رپورٹ میں روشنی ڈالی گئی ہے کہ کس طرح ملک میں مسلمانوں کو قانون نافذ کرنے والے اداروں کی طرف سے غیر متناسب طور پر تشدد کا نشانہ بنایا جاتا ہے اور اکثر انصاف سے محروم رکھا جاتا ہے۔ رپورٹ بتاتی ہے کہ مسلمانوں کے خلاف تشدد کوئی الگ تھلگ واقعہ نہیں بلکہ بار بار دہرایا جانے والا مسئلہ بن چکا ہے۔ خاص طور پر اتر پردیش اور گجرات جیسی ریاستوں میں صورتحال زیادہ خراب ہے جہاں حکمراں بھارتیہ جنتا پارٹی (بی جے پی) اور ہندوتوا قوتوں سے وابستہ دائیں بازو کے نظریات غالب ہیں۔ مسلمان، دلتوں اور دیگر پسماندہ برادریوں سے تعلق رکھنے والے افراد اکثر اپنی شناخت کی بنیاد پر مجرم قرار دیئے جاتے ہیں نہ کہ کسی اصل جرم کی وجہ سے۔ رپورٹ بتاتی ہے کہ تشدد کے یہ واقعات جسمانی زیادتی سے لے کر کئی زیادہ سنگین واقعات تک پھیلے ہوئے ہیں جن میں حراستی قتل بھی شامل ہیں۔ حیران کن طور پر نیشنل کرائم ریکارڈز بیورو (این سی آر بی) نے ۲۰۱۱ء سے ۲۰۲۲ء کے درمیان ہندوستان میں ایک ہزار ۱۰۷ حراستی اموات ریکارڈ کیں لیکن ان اموات کیلئے ایک بھی پولیس افسر کو سزا نہیں دی گئی۔

یہ بھی پڑھئے: اتراکھنڈ میں مدارس کے خلاف کریک ڈاؤن جاری: ۱۷۰؍ مدارس سیل، وزیراعلیٰ نے اسے "تاریخی قدم" قرار دیا

مسلمانوں کے خلاف پولیس کا تشدد کوئی نیا رجحان نہیں ہے۔ رپورٹ کے مطابق، یہ ملک کے پولیسنگ نظام کا ایک گہرا حصہ بن چکا ہے۔ چاہے چھوٹے الزامات جیسے چوری یا کرفیو کی خلاف ورزی سے نمٹنا ہو، مسلمانوں کو اکثر پولیس کی غیر ضروری جارحیت کا سامنا کرنا پڑتا ہے۔ انہیں مار پیٹ، ذلت اور زیادتی کا نشانہ بنایا جاتا ہے، کبھی کبھار تو معمول کی تفتیش کے دوران بھی ان کے ساتھ بدتر سلوک کیا جاتا ہے۔ اس کے علاوہ، مسلم قیدیوں کو اکثر قانونی مشورے تک رسائی سے محروم رکھا جاتا ہے جس کی وجہ سے بہت سے خاموشی سے تکلیف سہتے ہیں اور انصاف حاصل کرنے سے قاصر رہتے ہیں۔

رپورٹ میں پولیس کی بربریت کو واضح کرنے والے مخصوص واقعات کا حوالہ بھی دیا گیا ہے۔ ایسا ہی ایک واقعہ فیصل نامی ایک نوجوان مسلم شخص سے متعلق ہے جسے اتر پردیش کے شہر اناؤ میں کووڈ-۱۹ وبا کے لاک ڈاؤن کے دوران سبزیاں بیچنے کیلئے باہر نکلنے پر پولیس افسران نے مارا تھا۔ اس کا"جرم" اس کی مسلم شناخت تھی جو بڑھتے اسلاموفوبیا کے ماحول میں اسے نشانہ بنانے کی وجہ ثابت ہوئی۔ یہ واقعات الگ تھلگ نہیں ہیں؛ بلکہ جڑے ہوئے ہیں اور ہندوستانی پولیسنگ نظام میں پھیلے ہوئے منظم تشدد کے ایک بہت بڑے نمونے کی عکاسی کرتے ہیں۔

یہ بھی پڑھئے: ’’مجھے یقین ہےکہ ہندوستان کے عوام کی اکثریت نہ تو عدم روادار ہے نہ تشدد پسند ‘‘

ایس پی آئی آر ۲۰۲۵ء رپورٹ کا سب سے زیادہ پریشان کن پہلو پولیس افسران میں گہرے تعصبات کا انکشاف ہے۔ جب پوچھا گیا کہ کون سی برادریاں جرائم کرنے کی سب سے زیادہ امکان رکھتی ہیں، تو ہندو پولیس افسران کی اکثریت نے جواب دیا کہ مسلمان اور عیسائی فطری طور پر مجرمانہ رویے کی طرف مائل ہوتے ہیں۔ یہ بے بنیاد عقیدہ، جس کی جڑیں صدیوں پرانے فرقہ وارانہ تعصب سے ملتی ہیں، مسلمانوں کے خلاف قانون نافذ کرنے والوں کے ہاتھوں تشدد کو ہوا دیتا ہے۔ یہ تعصبات چند بدعنوان افسران تک محدود نہیں ہیں؛ یہ پولیس فورس کے اندر، خاص طور پر بی جے پی کی زیر اقتدار ریاستوں میں، وسیع پیمانے پر پھیلے ہوئے ہیں۔ مثال کے طور پر، گجرات میں، دو تہائی پولیس افسران کا خیال ہے کہ دلت فطری طور پر مجرم ہیں، جبکہ ۵۵ فیصد ہندو افسران کا یہی خیال مسلمانوں کے بارے میں ہے۔ یہ امتیازی نظریات پریشان کن ہیں اور غیر قانونی اقدامات، جیسے من مانی گرفتاریوں اور حراستی زیادتیوں کو جواز فراہم کرنے میں اہم کردار ادا کرتے ہیں۔ اس صورتحال کو اور بھی پریشان کن بنانے والی بات یہ ہے کہ ان مظالم کو انجام دینے والے پولیس افسران کو تقریباً مکمل استثنیٰ حاصل ہے۔ ایک ہزار ۱۰۷ حراستی اموات کے خوفناک اعدادوشمار کے باوجود ۲۰۱۱ء سے ۲۰۲۲ء کے درمیان ان میں ملوث کسی بھی افسر کو سزا نہیں دی گئی۔ جوابدہی کا یہ فقدان پولیس کو ایک ڈھکا چھپا پیغام دیتا ہے: وہ قانونی نتائج کے خوف کے بغیر، اقلیتوں کو مار سکتے ہیں، تشدد کر سکتے ہیں اور زیادتی کر سکتے ہیں۔

ایس پی آئی آر ۲۰۲۵ء رپورٹ زور دیتی ہے کہ یہ نظام کی ناکامی نہیں بلکہ قانون نافذ کرنے والے افسران کو جوابدہی سے بچانے کی ایک دانستہ کوشش ہے۔ رپورٹ سے پتہ چلتا ہے کہ جب انسانی حقوق کی خلاف ورزیوں کی شکایات قومی انسانی حقوق کمیشن (این ایچ آر سی) کو رپورٹ کی جاتی ہیں، تو انہیں اکثر نظر انداز کردیا جاتا ہے۔ مثال کے طور پر، ۲۰۲۳ء میں این ایچ آر سی نے ۱۵۱ حراستی اموات ریکارڈ کیں لیکن کسی بھی پولیس افسر کے خلاف کوئی کارروائی نہیں کی گئی۔ بیشتر معاملات میں، پولیس کی طرف سے مسلمانوں پر ڈھایا جانے والا تشدد جان بوجھ کر چھپایا جاتا ہے۔ ڈاکٹروں پر اکثر دباؤ ڈالا جاتا ہے کہ وہ اپنی میڈیکل رپورٹس میں پولیس کی بربریت کے ثبوت شامل نہ کریں، جس سے افسران تفتیش سے بچ جاتے ہیں۔ آزاد تحقیقات اور شفافیت کی کمی طاقت کے غلط استعمال کو مزید ہوا دیتی ہے۔ مزید برآں، بنیادی قانونی طریقہ کار پر عمل نہ کرنے کی ناکامی، جیسے گرفتار شدہ افراد کو ۲۴ گھنٹوں کے اندر مجسٹریٹ کے سامنے پیش کرنا، بڑے پیمانے پر جاری ہے۔ رپورٹ کے مطابق، صرف ۵۶ فیصد افسران اس تقاضے کی تعمیل کرتے ہیں اور کرناٹک جیسی ریاستوں میں صورتحال اس سے بھی بدتر ہے۔ قانون کی یہ خلاف ورزیاں تشدد کی منظم نوعیت اور انسانی حقوق کے لیے مکمل لاپرواہی کو اجاگر کرتی ہیں۔

یہ بھی پڑھئے: کرناٹک میں مسلمانوں کی آبادی ۱۸؍ فیصد، ۸؍ فیصد ریزرویشن کی سفارش

ایس پی آئی آر ۲۰۲۵ء رپورٹ پولیس کے رویے کو تشکیل دینے میں سیاسی نظریات کے کردار کو بھی واضح کرتی ہے۔ بہت سے افسران سمجھتے ہیں کہ وہ مسلمانوں کو نشانہ بنا کر “قومی خدمت” انجام دے رہے ہیں اور سیاستدان ان کے غلط کاموں کیلئے انہیں انعام سے نوازتے ہیں۔ یہ خطرناک ذہنیت خاص طور پر بی جے پی کی زیر اقتدار ریاستوں میں عام ہے، جہاں گئو کشی مخالف قانون جیسے قوانین کو مسلمانوں کے خلاف تشدد کا جواز بنانے کیلئے استعمال کیا گیا ہے۔ گجرات میں ۵۱ فیصد پولیس افسران نے اعتراف کیا کہ وہ گئو کشی کے الزامات سے متعلق معاملات میں ہجومی تشدد کی حمایت کرتے ہیں جس میں اکثر مسلمانوں کو نشانہ بنایا جاتا ہے۔ رپورٹ واضح کرتی ہے کہ ان نظریات نے پولیسنگ کو قانون کی پاسداری کے پیشے سے تبدیل کر کے سیاسی اور مذہبی ایجنڈوں کو آگے بڑھانے کا ایک آلہ بنا دیا ہے۔ ہندو قوم پرستی کے عروج نے نہ صرف مسلمانوں کے خلاف تشدد کو ہوا دی ہے بلکہ اس خیال کو بھی معمول بنا دیا ہے کہ ایسا تشدد قوم کے “بڑے خیر” کے لیے قابل قبول بلکہ ضروری ہے۔

رپورٹ میں شامل ایک اہم نکتہ یہ ہے کہ ہندوستان میں تشدد کو جرم قرار دینے کیلئے کوئی مخصوص قانون موجود نہیں ہے۔ اگرچہ ہندوستان نے ۱۹۹۷ء میں اقوام متحدہ کے تشدد کے خلاف کنوینشن پر دستخط کئے تھے لیکن ملک میں کوئی اینٹی ٹارچر قانون سازی نہیں کی گئی۔ یہ قانونی خلاء ان لوگوں کو تحفظ فراہم کرتا ہے جو حراستی تشدد میں ملوث ہیں، جس سے وہ بغیر کسی خوف کے ایسی کارروائیاں انجام دے سکتے ہیں۔ خاص طور پر تشدد کو حل کرنے والے قانون کے بغیر، پولیس افسران کو ان کے اعمال کیلئے جوابدہ بنانا تقریباً ناممکن ہے۔ رپورٹ، افسران کو جوابدہ ٹھہرانے میں عدالتی نظام کی ناکامی کو بھی اجاگر کرتی ہے۔ تشدد اور اس سے بچانے کیلئے بنائے گئے قوانین کے باوجود، جب پولیس افسران کی بات آتی ہے تو ان کا نفاذ شاذ و نادر ہی ہوتا ہے۔ پولیس اصلاحات کو نافذ کرنے کی سیاسی خواہش کی کمی صورتحال کو مزید خراب کرتی ہے اور اس بات کو یقینی بناتی ہے کہ پولیس کی بربریت کو قابو میں نہ کیا جائے۔

یہ بھی پڑھئے: وقف قانون کےخلاف احتجاج کے بعد پھوٹ پڑنے والے تشدد میں مرشد آباد میں ۳؍ کی موت،۱۰۰؍ سے زائد گرفتار

ایس پی آئی آر ۲۰۲۵ء رپورٹ ان خامیوں کی نشاندہی کے ساتھ اشد ضروری اصلاحات کیلئے کئی سفارشات بھی پیش کرتی ہے۔ ان میں ایک اینٹی ٹارچر قانون کا تعارف، حراستی اموات کی آزاد تحقیقات اور پولیس افسران کیلئے لازمی انسانی حقوق کی تربیت شامل ہے۔ رپورٹ پولیسنگ سرگرمیوں کے دوران مخصوص برادریوں، خاص طور پر مسلمانوں کو، نشانہ بنانے کے خاتمہ کا مطالبہ کرتی ہے۔ رپورٹ کے مصنفین پولیس فورس کے اندر گہرے تعصبات کو ختم کرنے کی ضرورت پر بھی زور دیتے ہیں۔ 

تحقیق میں شامل ایک محقق محمد آصف نے کلیریئن انڈیا سے خصوصی طور پر بات کرتے ہوئے تحقیق کے عمل کے دوران درپیش بے پناہ چیلنجز کے بارے میں بتایا کہ یہ ایک مشکل اور تھکا دینے والا کام تھا۔ لیکن اس میں کچھ بہت اہم اور چونکا دینے والے انکشافات سامنے آئے ہیں جو انسانی حقوق اور پالیسی ساز اداروں کیلئے ایک اہم دستاویز کے طور پر کام آ سکتے ہیں۔ انہوں نے رپورٹ کے نتائج کی طرف اشارہ کرتے ہوئے مزید کہا کہ زیادہ تر پولیس افسران کے پاس پہلے سے ہی یہ تصور موجود ہے کہ مسلمان فطری طور پر جرائم کی طرف مائل ہیں۔ اس رویے کی اصلاح کرنے ضرورت ہے اور اسے صرف انسانی حقوق، تعلیم، اور قانون نافذ کرنے والے تمام سطحوں پر اصلاح کیلئے سنجیدہ عزم کے ذریعے تبدیل کیا جا سکتا ہے۔ آصف کا کہنا ہے کہ یہ شدید ذہنیت صرف ایک الگ تھلگ مسئلہ نہیں بلکہ ایک منظم مسئلہ ہے جس پر فوری توجہ دینے کی ضرورت ہے۔ اس رپورٹ کے نتائج جامع پولیس اصلاحات کی فوری ضرورت کو واضح کرتے ہیں اور قائم شدہ آزاد اداروں کو حراستی اموات اور تشدد کی زیادہ سختی سے تحقیقات کرنے کی ضرورت پر زور دیتے ہیں۔ رویوں اور قانونی جوابدہی میں تبدیلی کے بغیر، صورتحال صرف بدتر ہوتی جائے گی۔

یہ بھی پڑھئے: ’’سیاسی وجوہات کیلئے نفرت انگیز تقاریر انتہائی تشویشناک ہیں‘‘

"ہندوستان میں پولیسنگ کی صورتحال رپورٹ ۲۰۲۵ء" ملک میں خاص طور پر مسلمانوں کے خلاف پولیس کی بربریت اور منظم تشدد کی ایک تاریک تصویر پیش کرتی ہے۔ مساوات اور انصاف کے آئینی وعدوں کے باوجود، مسلمان قانون نافذ کرنے والوں کے ہاتھوں امتیازی سلوک، تشدد اور موت کا سامنا کررہے ہیں۔ افسران کو جوابدہ نہ ٹھہرانے کی ناکامی، پولیس فورس کے اندر گہرے تعصبات کے ساتھ، انصاف کی بہت کم امید چھوڑتی ہے۔ تاہم، رپورٹ امید کی ایک کرن بھی فراہم کرتی ہے۔ ان مظالم کو بے نقاب کر کے اور فوری اصلاحات کا مطالبہ کر کے، یہ رپورٹ پالیسی سازوں، انسانی حقوق کی تنظیموں اور شہری معاشرے کیلئے تبدیلی کا مطالبہ کرنے کی ایک آواز کے طور پر کام کرتی ہے۔ انصاف اور جوابدہی کی لڑائی ابھی ختم نہیں ہوئی لیکن ایس پی آئی آر ۲۰۲۵ء جیسی رپورٹس اس بات کو یقینی بنانے میں ایک ضروری پہلا قدم ہے کہ ہندوستان کی مسلم آبادی کو وہ عزت، انصاف اور مساوات ملے جس کی وہ مستحق ہے۔